آج سے ایسی کی تیسی، لوگ سرنڈر کرنا شروع کرینگے :واوڈا
پاکستان کے دشمن ایم این اے ، سینیٹرز اور وزرا افغانستان چلے جائیں،بیان مائنس ون نہیں تو تحریک انصاف پوری مائنس ہو گی ، رگڑ دیں گے ،انٹرویو
لاہور(این این آئی)سینیٹر فیصل واوڈا نے کہا ہے کہ اگر کوئی عمرانیت پر فرنٹ فٹ پر آئے گا تو فرنٹ رہے گا نہ فٹ،آج پیر سے ایسی کی تیسی ہوگی، لوگ سرنڈر کرنا شروع کرینگے ، پی ٹی آئی کے خلاف نااہلی، پابندی اور نو مئی کیسز کا منطقی انجام آپشنز میں شامل ہے ، بھارت کا لبادہ اوڑھ کر ایوان میں بیٹھے افراد کو کیڑے مکوڑوں کی طرح مسل دیا جائے گا۔انہوں نے اشارہ دیتے ہوئے کہا کہ اگر عمرانیت کے نام پر ریاستی اداروں کے خلاف سازش کی گئی تو ریاست بھرپور ردعمل دے گی۔9 مئی کے کیسز، نااہلی، پابندی، گورنر راج اور خیبرپختونخوا میں مفرور عناصر کے خلاف کارروائی کو آپشنز میں شامل کیا جا چکا ہے ۔ اپنے ایک بیان میں انہوں نے بانی پی ٹی آئی پر بھی تنقید کرتے ہوئے کہا کہ وہ مسلسل فوج پر حملے کرتے رہے ،پاکستان کے دشمن ایم این اے ، سینیٹرز اور وزرا ء افغانستان چلے جائیں۔
انہوں نے بیرسٹر گوہر خان کو مخلص قرار دیتے ہوئے کہا کہ وہ دوسروں سے مختلف ہیں۔خیبر پختوانخوا کے وزیراعلیٰ کے حوالے سے واوڈا نے بتایا کہ انہیں بدمعاشی نہ کرنے کی وارننگ دی گئی تو وہ واپس چلے گئے اور سہیل آفریدی نہ اڈیالہ آئے اور نہ اسلام آباد ہائی کورٹ تو بہنوں کی ملاقات ہوگئی،خیبرپختونخوا میں ایک انفارمیشن سیکرٹری بھی مفرور ہے اسے بھی پٹہ ڈالیں گے ۔انہوں نے کہا کہ پاکستان کسی کے باپ کی جاگیر نہیں ،جو لوگ لسانیت پھیلا رہے ہیں ان کا منہ کالا ہوگا۔ انہوں نے واضح کیا کہ سیاست میں لسانی ہوا دینا مناسب نہیں اور قومی یکجہتی کو نقصان پہنچانے والے افراد کے خلاف سخت اقدامات کیے جائیں گے ۔انہوں نے کہا کہ 9 مئی کے کیسز منطقی انجام کو پہنچ رہے ہیں جوجیساکرے گا ویسا ہی بھرے گا، ڈرنے اور ڈرانے کا وقت ختم ہو گیا، اب ایکشن کی باری ہے ، غنڈہ گردی اور بدمعاشی والے مٹھی بھر ہیں، آج پیر سے لوگ سرنڈر کرنا شروع کر دیں گے ۔انہوں نے کہا کہ بڑے بڑے توپ پہلے ہی ہاتھ اٹھاچکے ہیں۔
ٹی وی سے گفتگو کرتے ہوئے سینیٹر فیصل واوڈا نے کہا ہے کہ مائنس ون نہیں تو پی ٹی آئی پوری مائنس، اب ایک انچ بھی برداشت نہیں کیا جائے گا، رگڑ دیں گے ۔ پی ٹی آئی کی مقبولیت ختم ہوچکی، یہ اقتدار اور پیسے کی جنگ کررہے ہیں، انہیں ملک سے محبت نہیں۔انہوں نے کہا کہ یہ سارا جھگڑا سیاستدانوں کے آپس کا ہے ، اب برداشت ایک انچ بھی نہیں کیا جائے گا، رگڑ دیں گے ، مائنس ون نہیں تو پی ٹی آئی پوری مائنس۔فیصل واوڈا کا کہنا تھاکہ اب ایکشن پر ڈبل ری ایکشن ہوگا، پیر سے ترقی شروع ہوجائے گی، ڈی جی آئی ایس پی آر کی پریس کانفرنس کے بعد بہت سارے لوگ سرنڈر کرچکے ہیں۔ان کا کہنا ہے کہ آج تک برداشت کرکے ہی یہاں تک آئے ہیں، ایک نیا سیاسی لفظ آیا ہے ، ایسی کی تیسی، بانی پی ٹی آئی کی بہنوں نے ایسا کام کردیا جو حکومت کو معلوم ہی نہیں تھا، ان کی بہنوں نے ان کی کمزوری بتادی کہ اگر کوئی بانی سے نہ ملے تو فرسٹیٹڈ ہوجاتے ہیں، مائنس ون مان لیں اور گھر جائیں۔
