سیاست کی کمرشلائزیشن

ابھی پچھلی نسل کی ہی تو بات ہے کہ ضیا الحق کی آمریت کے خلاف لازوال جرات اور ہمت سے جدوجہد کی گئی۔ نوجوان، مزدوراور کسان قید و بند کی صعوبتیں جھیلتے رہے۔ گولیوں کی بوچھاڑ میں جلسے جلوس اور احتجاجی مظاہرے ہوتے رہے اور یہ گولیاں ربڑ کی نہیں تھیں۔ ہزاروں سیاسی کارکنوں کو سر عام کوڑے مارے گئے، نہ جانے کتنے پھندے پر جھول گئے یا کبھی واپس نہ آنے کے لئے ٹارچر سیلوں میں بھیج دیے گئے۔ اس سیاسی تحریک میں پوسٹر لگانے سے لے کر دریاں بچھانے، کرسیاں لگانے اور پنڈال سجانے تک کا سارا کام بے لوث سیاسی کارکن کیا کرتے تھے۔ یہ کام کرائے پر کرانا یاپارٹی کارکن کی قیمت لگانا جرم تصور کیا جاتا تھا۔ کسی سیاست دان میں جرأت تھی نہ ایسی کوئی ریت روایت کہ سیاسی سرگرمیوں میں زر کا زہر شامل کیا جائے۔

پیپلز پارٹی اور بائیں بازو کے سیاسی کارکنوں نے ضیا آمریت کے خلاف قربانیوں کی داستان اپنے لہو سے رقم کی۔ پھر جمہوریت آئی۔ چہرے اور سیاست کے انداز بدل گئے۔ اس ''جمہوریت‘‘ میں سرمائے کی آمریت اور بھی وحشی ہو گئی۔ نظریات کو سیاست سے خارج کر دیا گیا۔ بدعنوانی کے جغادری، پیسے کے پجاری اور انگلی کٹوا کر شہیدوں میں شامل ہونے والے سیاست دان ''رہنما‘‘ بن گئے۔ کارکنان کی قربانیوں کو سر بازار نیلام کیا جانے لگا۔ جیلوں، کوڑوں اور پھانسیوں کے نیلام گھر سجائے گئے۔ نظریات سے عاری اس سیاست میںاقتدار کے حصول کے لئے، محنت کش عوام کی روایت پیپلز پارٹی کو سرمایہ داروں اور جاگیر داروں کا آلہ کار بنا دیا گیا۔ کارکنوں کے لئے سیاست، معیشت، نظرئیے پر بحث مباحثے اور پارٹی پالیسی پر اثر انداز ہونے کے تمام راستے بند کر دیے گئے۔ نجکاری کا آغاز بھی اسی دور میں کیا گیا۔ 1968-69ء میںسرمایہ داری کے خلاف عوام کی آواز بن کر ابھرنے والی پیپلز پارٹی اب اسی نظام کا حصہ بن کے رہ گئی۔ عوام کی امیدیں دم توڑنے لگیں اور پارٹی کی سماجی بنیادیں کھوکھلی ہوتی چلی گئیں۔ سامراج اور ریاست نے پینترا بدلا اور حکمران طبقے کی روایتی جماعت مسلم لیگ کو اقتدار میں لایا گیا تاکہ بدگمان اور نڈھال عوام پر کھل کر معاشی حملے کئے جائیں۔ محنت کش طبقے پر استحصال اور لوٹ مار کی کاری ضربیں لگائی جانے لگیں۔ اس ڈاکہ زنی اور بندر بانٹ نے حکمران طبقے کے آپسی نفاق کو جنم دیا اور ریاست کی یہ داخلی لڑائی ایک بار پھر پیپلز پارٹی کو برسر اقتدار لے آئی۔ قیادت نے پارٹی کے سوشلسٹ پروگرام سے انحراف کی روش برقرار رکھی۔شاہ سے زیادہ شاہ کا وفادار بن کے کھلی عوام دشمن سرمایہ دارانہ پالیسیاں اپنائی گئیں۔توانائی کے شعبے میں مقامی اور سامراجی نجی کمپنیوں کی مداخلت اسی دور میں شروع ہوئی۔ اسٹیبلشمنٹ اور سامراج کو مکمل وفاداری کا عندیہ دیا گیا۔ عوام کی آرزوئوں کو کچل کے رکھ دیا گیا۔

عوام برباد ہوتے رہے، حکومتیں بدلتی رہیں، ''جمہوریت‘‘ چلتی رہی لیکن معاشی بحران اور سیاسی خلفشار اس حد تک بڑھ چکا تھا کہ فوج کو بادل نخواستہ آنا پڑا۔مروجہ سیاست عوام کی نظروں میں مسترد ہو کر اتنی گر چکی تھی کہ مشرف نے اپنے لئے چیف مارشل لا ایڈمنسٹریٹر کی بجائے چیف ایگزیکٹو کا عہدہ منتخب کیا۔ آدھا تیتر آدھا بٹیر والی اس نیم جمہوریت نیم آمریت کے ذریعے نظام کو چلانے کی کوشش کی گئی۔ عالمی سطح پر معاشی بوم سے فائدہ اٹھا کر کریڈٹ فنانسنگ کے ذریعے نسبتاً بلند معاشی شرح نمو حاصل کی گئی لیکن عوام کی زندگیوں میں کوئی بہتری نہ آسکی اور اوسطاً دس ہزار انسان ہر روز خط غربت سے نیچے گرتے رہے۔ریاست کے داخلی تضادات نے مشرف کو رخصت ہونے پر مجبور کیا۔

ایک نئی نسل جوان ہو چکی تھی۔ 18اکتوبر 2007ء کو نئی نسل کی نئی امید لاکھوں محنت کشوں اور نوجوانوں کو کراچی کی سڑکوں پر لے آئی۔ سامراج، ریاست اور پارٹی قیادت کے معاہدے کو عوام کا سمندر بہا لے گیا۔وفاداری اور 'حد‘ میں رہنے کی تمام تر یقین دہانیوں کے باوجود اس ابھرتی ہوئی تحریک کے محور کو 27دسمبر 2007ء کو ختم کر دیا گیا۔حسب روایت اس شہادت کی بھی بولی لگوائی گئی۔ پیپلز پارٹی حکومت نے بے حسی، انحراف اور زوال پزیری کے تمام ریکارڈ توڑ دیے۔ غربت، مہنگائی، لوڈ شیڈنگ اور بے روزگاری کو نئی انتہائوں تک پہنچا دیا گیا۔قدیم یونانی کہاوت ہے کہ دیوتا جنہیں غرق کرنا چاہتے ہیں پہلے انہیں پاگل کرتے ہیں۔پیپلز پارٹی تو عوامی نامقبولیت کا شکار بنی ہی لیکن بدترین معاشی زوال کی کیفیت میں ریاست کے کچھ حصوں نے ''بھاری مینڈیٹ‘‘ دلا کر سرمایہ داروں کی ''مضبوط حکومت‘‘ قائم کرا دی۔گزشتہ ایک سال میں عوام کا جو حشر ہوا سو ہوا لیکن ساتھ ہی ساتھ اس'' مینڈیٹ ‘‘ اور ''مقبولیت‘‘ کا پول بھی کھل گیا۔مینڈیٹ جتنا بڑا تھا حکومت اتنی ہی کھوکھلی ہے۔ نواز لیگ کے تمام پارٹی رہنمائوں میں ایک بات مشترک ہے۔ سب بڑے سرمایہ دار اور کاروباری ہیں۔

آج سیاست اس حد تک کمرشلائز ہو چکی ہے کہ پارٹی ٹکٹ، جلسے، جلوس، انتخابی مہم اور دھرنے...ہر سیاسی سرگرمی کاروبار بن چکی ہے۔ عوام سیاست سے لاتعلق اور بد ظن ہیں۔ ان حالات میں سرمائے کی ساری سیاست پیسے اور ٹھیکے پر چلائی جارہی ہے۔ پرانی دہلی کے سیتا رام بازار اور ''آزاد مارکیٹ‘‘ میں دھرنوں، جلسوں اور مظاہروں کے لئے نہ صرف مختلف محکموں کی وردیاں بلکہ سیاسی کارکن بھی کرائے پر ملتے ہیں۔پاکستان کی تمام سیاسی پارٹیاں بھی ایسے ہی بازار کی گاہک ہیں۔

حالیہ نورا کشتی میں حکمران طبقے کے دو سیاسی دھڑے باہم برسر پیکار ہیں۔ یہ لانگ مارچ اور دھرنے کرنے والوں کی معاشی بنیادیں مروجہ سیاست کے دوسرے رجحانات سے قطعاً مختلف نہیں ہیں۔ 5ستمبر کو بی بی سی نے ایک رپورٹ ''انقلابیوں کو گھر جانے کی اجازت نہیں ‘‘ کے عنوان سے شائع کی۔ رپورٹ کے مطابق ''پاکستان عوامی تحریک کے 'انقلاب مارچ‘ میں مبینہ طور پر کرائے پر لائے جانے والے افراد اب اپنے گھروں کو جانے کے منتظر ہیں... جب وہ اپنے عہدیداروں سے کہتے ہیں کہ وہ اپنے گھروں کو واپس جانا چاہتے ہیں تو اْنھیں سنگین نتائج کی دھمکیاں دی جاتی ہیں‘‘۔ رپورٹ میں مزید بتایا گیا ہے کہ قادری کے دھرنے میں ایک ادارے کے ملازمین کی بڑی تعداد شریک ہے، گوجرانوالہ سے لائی گئی خواتین کے گھر والوں کو دس ہزار روپے ماہانہ دئیے جارہے ہیں، ان خواتین کو کہا گیا ہے کہ شیر خوار بچے ساتھ لانے پر انہیں پانچ ہزار روپے اضافی دیے جائیں

گے۔ عمران خان کے مارچ اور دھرنے کی صورتحال بھی زیادہ مختلف نہیں۔ لینن کے بقول ''سیاست مجتمع معیشت کا عکس ہوتی ہے۔‘‘ اگر نواز لیگ سرمایہ داروں اور جاگیر داروں کی پارٹی ہے تو تحریک انصاف کی قیادت میں کون سے فقیر بیٹھے ہوئے ہیں؟ چندہ دینے والی ملکی اور غیر ملکی قوتوں کے بغیر کوئی اپنے مدرسے اور دھرنے چلا سکتا ہے؟ نچلی سطح کے جن ملازمین کو تنخواہ کے ساتھ ساتھ تین وقت کا کھانا بھی مل رہا ہے وہ تو ساری عمر بھی دھرنے میں بیٹھنے سے گریز نہیں کریں گے۔

سوال کسی ایک یا دوسری پارٹی کا نہیں۔ ہر طرف سرمائے کا راج ہے۔یہ راج اسی طبقے کے مفادات کا محافظ ہے جو سیاست اور ریاست کو خرید سکتا ہے۔ یہ سوچنا کہ اس نظام میں کبھی غریبوں کی بھی سنی جائے گی، سراسر خود فریبی ہے۔ تعلیم اور علاج کی فراہمی ''آئین کے مطابق‘‘ ریاست کی ذمہ داری ہے لیکن حکمران طبقہ کیا آئین پڑھ کر سب کچھ کرتا ہے؟ آئین اور قانون کمزور اور غریب کے لئے ہوتا ہے، طاقتور مکڑی کے یہ جال توڑ کر نکل جاتا ہے۔ نجی پاور پلانٹس سے لے کر صنعت و زراعت اور تعلیم و علاج کے منافع بخش کاروبار تک، جو طبقہ دولت اور ذرائع پیداوار پر حاوی ہے‘ سیاست اور ''جمہوریت‘‘ بھی اسی کی باندی ہے۔ نواز شریف سے لے کر عمران خان اور طاہر القادری تک... اس سیاست کا ہر رجحان اسی طبقے کا نمائندہ ہے۔تاریخ میں کسی حکمران طبقے نے اپنی دولت، مراعات اور ملکیت رضاکارانہ طور پر نہیں چھوڑی۔ یہ سب کچھ محنت کشوں کو چھیننا پڑتا ہے۔ اسی عمل کو انقلاب کہتے ہیں۔لیکن استحصالی نظام کی سیاست کرنے والے کبھی اپنے اور اپنے نظام کے خلاف ''انقلاب‘‘ برپا نہیں کر سکتے۔ محنت کش عوام طبقاتی بنیادوں پر حکمران طبقے اور اس کے نظام کے ہر ادارے، ہر قدر سے ٹکرا کر انقلابات برپا کرتے ہیں‘ تب اشتراکی سماج وجود میں آتے ہیں۔

روزنامہ دنیا ایپ انسٹال کریں