ٹیکنالوجی : رحمت یا زحمت ؟

آج بیشتر افراد کی زندگی میں موبائل فون کا کردار جسم کے کسی عضو سے بھی زیادہ اہمیت اختیار کرتا جارہا ہے۔ گھر کے اندر، باہر، سوتے ، جاگتے، ہر انسان نے موبائل پکڑ رکھا ہے،گویا موبائل نے انسان کو جکڑ رکھا ہے۔ نئی نسل کی اکثریت لیپ ٹاپ اور موبائل فون کی سکرینوں میں ایسے غرق ہوتی جارہی ہے کہ سماجی تعلقات مفلوج اور انسانوں کے مابین براہ راست ربط محدود ہو چکا ہے۔ یہ ماضی بعید کی بات نہیں کہ ٹیکنالوجی کے ان کھلونوں کے بغیر بھی لوگ اچھی خاصی زندگی گزارتے تھے۔ رابطے بھی تھے اور تعلقات بھی اور آج سے کہیں زیادہ بے لوث اور خالص۔ محبتیں چلتی اور عشق بھی ہوا کرتے تھے، دور رہ کر بھی انسانوں کی قربت آج سے کہیں زیادہ تھی۔

ان ''گیجٹس‘‘ سے لاحق ہونے والی جسمانی اور نفسیاتی بیماریوں سے ہٹ کر بھی بات کی جائے تو موبائل، انٹرنیٹ اور سوشل میڈیا کے گرد گھومتی ہوئی زندگیاں روح کی غربت کا اظہار ہیں۔ یہ اس بیگانگی کی علامت ہیں جس کا شکار انسان کو رائج الوقت سماجی و اقتصادی نظام کی تاریخی متروکیت نے بنا دیا ہے۔ نفسا نفسی بڑھتی جارہی ہے، احساس مٹ رہے ہیں اور سوچ گھائل ہے۔ اتنی بھیڑ میں بھی تنہائی کا احساس ہر دل میں سلگ رہا ہے جسے کبھی سماجی رابطوں کی ویب سائٹس تو کبھی ویڈیو گیمز سے مٹانے کی کوشش کی جاتی ہے۔ موبائل فون پر ہونے والی بات چیت کا جائزہ لیا جائے تو زیادہ ترگفتگو لین دین اور پیسے کے حساب کتاب کے گرد ہی گھومتی ہے۔ اندرکے احساس محرومی کو مصنوعی طریقوں سے دبانے یا مٹانے کی جتنی کوشش کی جائے، خلش اتنی ہی بڑھتی جاتی ہے۔

جدید ٹیکنالوجی، نئی ایجادات اور سائنس میں پیش رفت کوئی غلط یا منفی عمل نہیں ہے۔ ذرائع پیداوار اور ٹیکنالوجی کی ترقی نے نسل انسانی کے سماجی ارتقا میں فیصلہ کن کردار ادا کیا ہے۔ مسئلہ یہ ہے کہ اس طبقاتی سماج میں نئی دریافتوں، ایجادات اور ٹیکنالوجی کی ترقی کا مقصد انسانی زندگی کو سہل بنانے کی بجائے انسانی محنت کے استحصال اور سرمایہ داروں کی شرح منافع میں اضافہ ہے۔ اٹھارہویں صدی میں صنعتی انقلاب کی بنیاد پر قائم ہونے والے سرمایہ دارانہ نظام نے اپنے ابتدائی عہد میں یورپ اور پھر دوسرے خطوں میں جدید ریاستوں اور ترقی یافتہ صنعتی معاشروں کو جنم دیا تھا۔ لیکن آج یہ نظام ترقی یافتہ ممالک میں بھی زوال پزیر ہے۔ ایک زمانے میں معیار زندگی کو بلند کرنے والا یہ نظام آج اس نہج پر پہنچ چکا ہے کہ ٹیکنالوجی میں ہونے والی ہر ترقی انسانی ضروریات کی تکمیل کی بجائے محرومی اور مانگ میں اضافہ کرتی ہے۔

حکمران طبقات اپنے نظام کو طول دینے اور بحران سے نکالنے کے لئے جنگوں کے ساتھ ساتھ نئی ایجادات کا سہارا بھی لیتے ہیں۔ سٹیم انجن سے لے کر بجلی اور اسمبلی لائن سے لے کر انٹرنیٹ تک،اس نظام میں ایجادات کا مقصد ہمیشہ پیداوار میں تیزی اور شرح منافع میں اضافہ رہا ہے۔ نئی ٹیکنالوجی متعارف کروائی جاتی ہے اور پھر مارکیٹنگ کے ذریعے اسے انسان کی ضرورت بنا دیا جاتا ہے۔ سماجی نفسیات کو ایسے شعبوں کی طرف مسلسل راغب کیا جاتا ہے جو زیادہ منافع بخش ہوتے ہیں۔ سرمائے کی یہ ہوس انسان کی بنیادی ضروریات کوکچل کے رکھ دیتی ہے۔ مناسب رہائش، صحت بخش غذا، صاف پانی کی فراہمی اور نکاس کا نظام، موبائل فون سے کہیں اہم انسانی ضروریات ہیں۔ لیکن اس نظام نے تنگ و تاریک گلیوں میں مقیم ، غذائی قلت سے دوچار اور غلیظ پانی پینے پر مجبور، آبادی کی وسیع اکثریت کے ہاتھوں میں ''سمارٹ فون ‘‘ تھما دیے ہیں۔ زندگی کی ترجیحات ہی مسخ کر دی گئی ہیں۔

سائنس اور ٹیکنالوجی کی ترقی انسانی شعور کو بہر حال آگے بڑھاتی ہے جو کہ ایک ترقی پسند پہلو ہے۔ قدامت پرستوں نے ہمیشہ نئی ایجادات اور سائنسی نظریات کی مخالفت کر کے تاریخی ارتقا کو جامد رکھنے کی کوشش کی ۔ سقراط نے رجعت کے سامنے سر تسلیم خم کرنے پر زہرکا پیالہ نوش کرنے کو ترجیح دی تھی۔ کلیسا کے عقائد کو چیلنج کرنے کی پاداش میں گیورڈانو برونو جیسے درجنوں عظیم سائنسدانوں اور فلسفیوںکو زندہ جلا دیا گیا۔ گلیلیو کو محض اس ''جرم‘‘کی پاداش میں عمر بھر نظر بند رکھا گیا کہ اس نے سورج کی زمین کے گرد گرش کے کلیسائی عقیدے کو سائنسی بنیادوں پر غلط ثابت کر دیا تھا۔ لیکن افراد کو قتل کر دینے سے نظریات نہیں مرا کرتے۔ قدامت پرست سارا زور لگا کر بھی جب تاریخ کا پہیہ واپس گھمانے میں ناکام رہتے ہیں تو منافقت کا راستہ اختیار کرتے ہیں۔ ماضی میں ٹیلیوژن کے خلاف فتوے جاری کرنے والے مذہبی لوگ آج ایئر ٹائم کم ملنے کا شکوہ کرتے ہیں۔ لائوڈ سپیکرکا استعمال ایک زمانے میں کفر تھا، آج سب سے زیادہ لائوڈ سپیکر مساجد پر نصب ہیں۔ انسانی سماج کو ماضی بعیدکے فرسودہ عقائد، توہمات اور تعصبات میں غرق کر دینے کے درپے داعش جیسی دہشت گرد تنظیمیں، پروپیگنڈا اور جنگ کے جدید ترین طریقہ کار استعمال کررہی ہیں۔

دوسری جنگ عظیم کے بعد بالعموم اورپچھلی کچھ دہائیوں کے دوران بالخصوص، سرمایہ داری نے شرح منافع میں کمی کے بحران سے نکلنے کے لیے پیداواری عمل کو بڑی افرادی قوت سے جدید مشینوں اور روبورٹس پر منتقل کیا ہے۔ اس قسم کی Capital Intensiveسرمایہ کاری سے پیداوار اور شرح منافع (وقتی طور پر) تو بڑھتی ہے لیکن نیا روزگار پیدا نہیں ہوتا۔ یوں اس نظام میں جدید ٹیکنالوجی انسانی زندگی کو سہل بنانے کی بجائے بڑے پیمانے کی بیروزگاری اور غربت کو جنم دے رہی ہے۔ سرمایہ داری کا تضاد یہ ہے کہ محنت کش طبقے کی اجرت ہی منڈی میں قوت خرید بنتی ہے۔ لہٰذا انسان کو روبورٹس میں تبدیل کرنے کا نتیجہ منڈی کے سکڑائو اور زائد پیداوار کے بحران کی شکل میں نمودار ہورہا ہے۔ ٹیکنالوجی میں ترقی سے پیداواری صلاحیت جوں جوں بڑھ رہی ہے، معاشی بحران گہرا ہوتا چلا جارہا ہے کیونکہ اس پیداوارکو خریدنے اور کھپانے کے لئے عوام کی جیب میں پیسے نہیں ہیں۔ عالمی سرمایہ داری کا اہم جریدہ اکانومسٹ اس صورت حال پر لکھتا ہے: ''ٹیکنالوجی میں جدت کے انقلاب نے کام (کی نوعیت ) کو جس بڑے پیمانے پر تبدیل اور تقسیم کیا ہے اس کی مثال گزشتہ سو سالوں میں نہیں ملتی۔ تھوڑے سے محنت کش وسیع پیمانے پر دولت پیدا کر رہے ہیں لیکن آمدن (اجرت) میں اضافہ نہیں ہورہا ہے۔۔۔۔۔ جرمنی اور برطانیہ جیسے ممالک، جہاںروزگار بڑھ رہا ہے وہاںاجرتوں میں سب سے زیادہ کمی کی جارہی ہے۔۔۔۔۔ذہین مشینوں کے ابھار کا مطلب ہے کہ زیادہ سے زیادہ مزدوروں کی نوکریاں خطرے میں پڑ جائیں گی۔۔۔۔۔جدید دور میں زیادہ دولت کی پیداوار نے روزگارکم کر دیا ہے۔ جیسے جیسے ٹیکنالوجی ترقی کرے گی، زیادہ نوکریاں ختم ہوںگی اور زیادہ محنت کشوںکو کم اجرت پر کام کرنا پڑے گا‘‘۔ اکانومسٹ میں چھپی یہ سطور سرمایہ دارانہ نظام کے اعتراف جرم سے کم نہیں ہیں جس نے ٹیکنالوجی کی ترقی کو انسانیت کے لئے رحمت کی بجائے زحمت بنا دیا ہے۔

گزشتہ صدی کے سب سے قابل اور مشہور سرمایہ دارانہ معیشت دان جان مینرڈ کینز نے 1930ء میں ایک کتاب ''ہماری آنے والی نسلوں کے معاشی ممکنات‘‘ کے عنوان سے تحریر کی تھی۔ اس کتاب میں ٹیکنالوجی کی ترقی کو مدد نظر رکھتے ہوئے کینز نے پیش گوئی کی تھی کہ اگلے سو سالوں میں (یعنی 2030ء تک) معیار زندگی میں کئی گنا اضافے کے باوجود ہفتہ وار کام کے اوقات کار 15گھنٹے تک آ جائیں گے اور کینز کے الفاظ میں''اپنی تخلیق کے بعد پہلی بارانسان کو ایک حقیقی اور مستقل مسئلے کاسامنا ہوگا: معاشی مشکلات سے آزاد ہونے کے بعد اپنے فارغ وقت کو دانائی سے کس طرح خوشگوار انداز میں استعمال کرے‘‘۔ ٹیکنالوجی کی ترقی کے بارے میں کینز کی پیش گوئی کم و بیش درست ثابت ہوئی ہے لیکن وہ سرمایہ دارانہ نظام سے متعلق حد سے زیادہ خوش فہمی کا شکار تھا۔گزشتہ تقریباً ایک صدی سے ترقی یافتہ ترین صنعتی ممالک میں بھی کام کے اوقات کار نہ صرف منجمد ہیں بلکہ نجکاری اور نیو لبرل معاشی حملوں نے محنت کشوں کو ''قانونی اوقات کار‘‘ سے کہیں زیادہ کام کرنے پر مجبورکر رکھا ہے۔

منڈی، منافع اور ہوس کی یہ معیشت انسان کو ٹیکنالوجی سے مستفید کرنے کی بجائے اس کاغلام بناتی چلی جائے گی۔ آج ٹیکنالوجی اور پیداواری صلاحیت اس قابل ہے کہ روزانہ کام کے اوقات دو گھنٹے تک لا کر چند برسوں میں بیروزگاری، قلت اور غربت کا خاتمہ عالمی سطح پر کیا جاسکتا ہے۔ انقلابی سوشلزم کا مطلب انسان کے ہاتھوںانسان کے استحصال کا خاتمہ اور منافع کی بجائے انسانی ضروریات کے لئے پیداوار ہے۔ ایک سوشلسٹ سماج میں ہی انسان ٹیکنالوجی کو اپنا مطیع بنا کر تسخیرکائنات کے سفر پر گامزن ہو سکتا ہے۔

روزنامہ دنیا ایپ انسٹال کریں