جب اطاعت کا فرماں اترا!

این جی اوز اور اصلاح پسند ''بائیں بازو‘‘ کے دلدادہ ''ترقی پسند بلوچ وزیر اعلیٰ‘‘ کی سربراہی میں بلوچستان کی قومی اسمبلی نے اطاعت کا ایک اور فرمان قرارداد کی شکل میں اتارا ہے۔ ہفتہ دو مئی کو بلوچستان اسمبلی نے الطاف حسین کے بیان کی پرزور مذمت کرتے ہوئے فوج کی پذیرائی پر مبنی قرارداد پاس کی۔ کچھ ہی دیر میں ایم کیو ایم کی رابطہ کمیٹی کے سینئر ڈپٹی کنوینر ندیم نصرت نے اپنے جوابی بیان میں کہا کہ ''اگر بلوچستان اسمبلی کے ارکان واقعتاً سچا بلوچ خون رکھتے ہیں تو اس سوال کا جواب دیں کہ ان لوگوں نے بلوچستان کے ہزاروں شہیدوں اور لاپتہ افراد کے لیے کب اور کتنی قراردادیں پیش کی ہیں؟‘‘ نصرت صاحب نے یہ وضاحت بھی نہیں کہ بلوچستان میں جاری قتل و غارت گری کے خلاف خود ایم کیو ایم نے کتنی مذمتی قراردادیں پیش کی ہیں اور وہاں فوجی آپریشن کے خلاف کتنے بیانات دیے ہیں۔ فوج کے حق میں بیانات کی بات کی جائے تو ایم کیو ایم دوسری ہر سیاسی جماعت سے آگے نظر آتی ہے۔
یہ بھی ایک حقیقت ہے کہ بلوچستان اسمبلی کی قرارداد میں ''ملک بھر‘‘ میں جاری جن فوجی آپریشنوں کے قصیدے پڑھے گئے ہیں ان میں بلوچستان کا آپریشن بھی شامل ہے۔ یہ قرارداد اس حوالے سے بہت اہمیت کی حامل ہے کہ بلوچستان میں موجود طبقاتی تفریق اور بلوچ عوام کی جدوجہد کی طرف بلوچ حکمرانوں کے رویے کو خوب واضح کرتی ہے۔ بالادست اور متوسط طبقے کے یہ ارکانِ اسمبلی جتنے ووٹ لے کر اقتدار میں آئے ہیں اور جن حالات میں یہ انتخابات ہوئے تھے اس کے پیش نظر بلوچستان کے عوام کی نمائندگی کا دعویٰ بڑا پھیکا سا معلوم ہوتا ہے۔
بلوچستان کے عام باسیوں کا المیہ یہ ہے کہ معدنیات کی بیش بہا دولت اور خطے کی جغرافیائی و اسٹریٹیجک اہمیت ان کے لیے وبال جان بن گئی ہے۔ سرمایہ دارانہ نظام کے بحران سے جنم لینے
والی شرح منافع کی گراوٹ نے عالمی و علاقائی سامراجی قوتوں اور کارپوریٹ اجارہ داریوں کو کہیں زیادہ خونخوار کر دیا ہے۔ سرمایہ داری کے یہ شوقین دوسرے خطوں کی طرح بلوچستان کو نوچ ڈالنے کے لیے ایک دوسرے سے برسرپیکار نظر آتے ہیں۔ ایک طرف بلوچستان کے حکمران طبقے کا وہ دھڑا ہے جو ریاستی اسٹیبلشمنٹ کی اطاعت میں اپنی حصہ داری کے لیے تگ و دو کر رہا ہے، دوسری طرف انہی حکمرانوں کے وہ دھڑے ہیں جو ریاست کی متحارب عالمی یا علاقائی قوتوں کی پراکسی بن کے اپنے 'شیئر‘بڑھانے میں سرگرم ہیں۔ مالی مفادات کی اس دوڑ اور تصادم کو کچھ بھی نام دے د یا جائے، اس خونی کھیل کا کردار نہیں بدل سکتا۔ سحر کے بقول:
ٹینک آگے بڑھیں کہ پیچھے ہٹیں
کوکھ دھرتی کی بانجھ ہوتی ہے!
بلوچستان کے غریب عوام پر جو بیت رہی ہے اس کی پروا کسی بھی ریاست سے تعلق رکھنے والے سامراجی آقائوں کو نہیں ہے۔ طبقاتی استحصال کے ساتھ قومی جبر بھی جاری ہے۔ معدنیات سمیت کئی حوالوں سے پاکستان کا امیر ترین صوبہ ہونے کے باوجود بلوچستان کے عوام کی محرومی بدترین ہے۔ بھوک، غربت اور پسماندگی کا جو عالم ہے وہ شاید افریقہ کی نوآبادیات میں بھی نہ ہوتا ہوگا۔ پہلے ہی افلاس کی اتھاہ گہرائیوں میں غرق ان غریبوں کو ریاستی جبر اور پراکسی جنگیں کچلتی جا رہی ہیں۔
1848ء میں قلات، خاران اور دوسرے علاقوں کو ریاست پاکستان میں ضم کرنے کے بعد سے آج تک قومی محرومی کے جذبات یہاں کے باسیوں میں سلگ رہے ہیں۔ 1948ء، 1958ء، 1962ء ، 1974ء اور اس کے بعد کے عرصے میں کئی مرتبہ سرکشی ہوئی اور مسلح جدوجہد کے کئی ادوار آئے۔ 60ء اور 70ء کی دہائی میں ہونے والی مسلح جدوجہد پر نظریہ حاوی تھا۔ ان تحریکیوں کے بیشتر رہنما خود کو سوشلسٹ اور مارکسسٹ قرار دیتے تھے۔ بائیں بازو کے نظریات کی گہری چھاپ موجود تھی۔ تنگ نظر لسانی تعصب، مالی مفادات یا موقع پرستی کے عناصر نہ ہونے کے برابر تھے، امریکہ یا کسی بھی دوسری سامراجی قوت سے بھی اتنی ہی نفرت کی جاتی تھی جتنی براہ راست جبر و استحصال کرنے والی قوتوں سے۔ اس عہد کے کئی مقبول بلوچ رہنما کھل کر وضاحت کرتے تھے کہ وہ قومی آزادی کی جدوجہد کو پورے خطے کی طبقاتی جنگ سے جوڑنا چاہتے ہیں اور دوسری قوموں کے محنت کش ان کے بھائی ہیں۔ ان کے آپسی اختلافات بھی نظریات یا لائحہ عمل پر ہوا کرتے تھے۔ کسی سامراجی قوت کا گماشتہ بننے کا سوال ہی پیدا نہیں ہوتا تھا۔
بلوچ سٹوڈنٹس آرگنائزیشن (BSO)جیسی سیاسی قوتوں کی بنیادیں آج بھی اُس دور کی روایات میں پیوست ہیں۔ لیکن یہ بھی حقیقت ہے کہ قیادت پر ایسے رجحانات بڑی حد تک حاوی ہوچکے ہیں جو سوشلسٹ نظریات کو یکسر مسترد کرتے ہیں۔ وہ ایک 'ریپبلکن‘ یعنی سرمایہ دارانہ بلوچستان چاہتے ہیں۔ حتیٰ کہ یہ سوچ بھی پائی جانے لگی ہے کہ امریکی سامراج بلوچستان کو ''آزاد‘‘ کروائے گا۔ زیادہ دور جانے کی ضرورت نہیں، افغانستان اور عراق کو جو ''آزادی‘‘ مغربی سامراجیوں نے دلوائی ہے اس سے بڑی بربادی بھلا کیا ہوسکتی ہے؟ جنوبی افریقہ میں ''آزادی‘‘ کے بعد کالے حکمرانوں کا جبر سفید فاموں سے بدتر ہے۔ بنگلہ دیش میں ''آزادی‘‘ کے بعد جو دودھ اور شہد کی ندیاں بہہ رہی ہیں وہ بھی سب کے سامنے ہیں۔
امریکی سامراج اگر اپنے مفادات کے لیے بلوچستان میں مداخلت کر رہا ہے تو چین کے حکمران بھی پیچھے نہیں ہیں۔ پھر ''ایشیا کا ابھرتا ہوا معاشی دیو‘‘ بھلاکیسے لاتعلق رہ سکتا ہے؟ ان پراکسی جنگوں میں بھارتی ریاست بھی پوری جارحیت سے ملوث ہے۔ لوٹ مار کے اس خونی کھلواڑ میں ایک نہیں کئی پراکسیاں استعمال ہو رہی ہیں۔ بے شمار ریاستی اور غیر ریاستی ایکٹرسرگرم ہیں اور اپنے معاوضے وصول کر رہے ہیں۔ قومی تحریک کے کئی گروہ اور دھڑے ہیں جن کے مقصد مختلف ہی نہیں متضاد ہیں۔ کئی ریاستوں کی کئی ایجنسیاں ملوث ہیں۔ مالی مفادات کے تحت وفاداریاں بدلتی رہتی ہیں اور تصادم کے نئے زاویے بنتے چلے جاتے ہیں۔
معاشی و سماجی مساوات کے واضح آثار رکھنے والی مہرگڑھ کی تہذیب، وادی سندھ کی تہذیب سے بھی دو ہزار سال پرانی ہے۔ بلوچستان تاریخی طور پر سیکولر تہذیب و روایات کا حامل رہا ہے لیکن کچھ سالوں سے فرقہ وارانہ قتل و غارت گری یہاں بھی وارد کر دی گئی ہے جو درحقیقت ایران اور عرب حکمرانوں کی آپسی چپقلش کا نتیجہ ہے۔ لیکن مذہبی بنیادوں پر اس مداخلت کی قوت محرکہ بھی آخری تجزیے میں مادی مفادات اور سامراجی تسلط ہے۔ حکمرانوں کے اس ٹکرائومیں مرنے والے غریب ہی ہیں۔ ہزارہ آبادی کے سینکڑوں بے گناہ انسان اس فرقہ وارانہ وحشت میں لقمہ اجل بن چکے ہیں۔
بلوچستان کے نوجوانوں نے انقلابی نوعیت کا کردار رکھنے والی قومی آزادی کی تحریکوں میں جدوجہد اور قربانیوں کی طویل داستان رقم کی ہے۔ یہ سلسلہ آج بھی جاری ہے اور وہ واضح طور پر قومی تحریک میں موجود طبقاتی تفریق کو سمجھ رہے ہیں، تلخ تجربات سے گزر رہے ہیں۔ ان تجربات سے اخذ کیے گئے نتائج انہیں قومی حریت کی تحریک کو طبقاتی جدوجہد سے جوڑنے کا راستہ بھی دکھائیں گے۔ آج ایک طویل عرصے کے بعد بلوچ نوجوانوں میں مارکسزم کو سمجھنے اور سوشلسٹ نظریات پر تحریک کی نظریاتی بنیادیں استوار کرنے کا جذبہ پھر سے پنپ رہا ہے۔ بلوچستان میں قومی تحریک کے ساتھ ساتھ مزدور تحریک بھی موجود ہے۔ مرک مارکر سے لے کر پاکستان کے کئی اداروں میں محنت کشوں کی جدوجہد جاری ہے اور ان تحریکوں نے ہار ماننے سے انکارکردیا ہے۔
ملک کے نسبتاً ترقی یافتہ علاقوں میں جو ریاست بجلی اور سیوریج جیسی بنیادی سہولیات فراہم کرنے سے قاصر ہے وہ بلوچستان جیسا پیچیدہ مسئلہ کیا حل کرے گی؟یہاں کے تاریخی طور پر نااہل حکمران طبقے میں اتنی معاشی اور سیاسی سکت ہی کہاں ہے۔ بلوچستان کا مسئلہ کسی 'پیکج‘ سے حل ہو گا نہ آپریشن اور لولی لنگڑی''جمہوریت‘‘ سے۔اس طرح کے ہتھکنڈوں سے نفرت، حقارت اور احساس محرومی میں اضافہ ہی ہوتا ہے۔ قومی آزادی کی منزل بلوچستان کے محنت کش اور نوجوان پورے خطے کی طبقاتی جدوجہد سے منسلک ہو کر ہی حاصل کر سکتے ہیں۔ یہیں سے جنوب ایشیا کے محنت کش عوام کی حقیقی آزادی کا آغاز ہو گا۔

روزنامہ دنیا ایپ انسٹال کریں