آئینی شقوں کی بے بسی

تاریخی طور پر آئین اور ''قانون‘‘ کا استعمال سامراج اور حکمران طبقات اپنی ریاست یا نظام کے خلاف ابھرنے والی بغاوتوں کو کچلنے اور انقلابیوں کو نشانِ عبرت بنانے کے لئے کرتے ہیں۔ برصغیر پر برطانوی راج کے دوران کانپور سازش کیس، میرٹ سازش کیس، غدر پارٹی کے خلاف بغاوت کے مقدمات ، 'ہندوستان سوشلسٹ انقلابی ایسوسی ایشن‘ سے وابستہ بھگت سنگھ اور اس کے ساتھیوں کے ٹرائل، 1946ء کی انقلابی تحریک کے بعد باغی جہازیوں پر چلائے جانے والے مقدمات جدوجہد آزادی کے نمایاں ابواب ہیں۔ تقسیم کے بعد 1951ء میں کمیونسٹ پارٹی کے رہنمائوں کے خلاف 'راولپنڈی سازش کیس‘ سے لے کر 1979ء میں ذوالفقار علی بھٹو کے عدالتی قتل جیسے واقعات، ریاستی جبر کے اوزار کے طور پر عدل و انصاف کے نظام کو واضح کرتے ہیں۔ ایسے مقدمات وقت کے ساتھ رائج الوقت معاشی و سیاسی نظام کے خلاف جدوجہد کے علامت بن جاتے ہیں۔
آج کل سپریم کورٹ کے سترہ رکنی بینچ پر مشتمل ایک اور دلچسپ کیس زیر سماعت ہے جس میں طبقاتی جدوجہد کے نظریے کو چیلنج کیا جارہا ہے۔ بینچ کی صدارت چیف جسٹس ناصر الملک کر رہے ہیں۔فل کورٹ 18ویں ترمیم کے تحت اعلیٰ عدالتوں کے ججوں کی تقرری اور 21ویں ترمیم کے تحت فوجی عدالتوں کے قیام کے خلاف درخواستوں کی سماعت کر رہا ہے۔ اس دوران ترامیم کا دفاع کرنے والے سینئر ایڈووکیٹ خالد انور نے سپریم کورٹ بینچ کے سامنے استدلال کرتے ہوئے کہا ہے کہ ''1973ء کا آئین اسلام اور سوشلزم کا پُراضطراب امتزاج تھا جو کبھی کامیاب نہیں ہو سکتا... آئین کا آرٹیکل 2اسلام کو سب سے بالادست قانون مانتا ہے جبکہ آرٹیکل 3سوویت یونین کے 1936ء کے آئین کے
آرٹیکل 12کی ہوبہو نقل ہے جس میں استحصال کے خاتمے اور ''ہر کسی سے اس کی اہلیت کے مطابق کام لیا جائے اور اس کے کام کے مطابق دیا جائے‘‘ کا اصول بتدریج نافذ کرنے کو کہا گیا ہے۔1973ء کے آئین کی خالق پیپلز پارٹی مذہب کی بنیاد پر نہیں بلکہ سوشلزم کے نظریے کے تحت روٹی، کپڑا ، مکان کا نعرہ لگا کر برسر اقتدار آئی تھی۔ تو کیا ہم مان لیں کہ آئین کا بنیادی ڈھانچہ سوشلزم ہے جس کابنیادی تصور مارکسزم اور لینن سے اخذ کیا گیا ہے...موجودہ آئین 1973ء کے آئین سے کہیں برتر ہے جس کا سہرا سپریم کورٹ کے ساتھ ساتھ پارلیمنٹ کے سر بھی جاتا ہے۔‘‘
تاریخی نقطہ نظر سے دیکھا جائے تو ریاست کا کردار اور نظریاتی مسائل پر فیصلے اس نظام کے حق میں ہی ہوتے ہیں جس کی نمائندگی یہ ادارے کرتے ہیں۔ آج بھی عدلیہ کا جھکائو اور مجموعی کردار بالکل واضح ہے۔ HRCPکوئی 'مارکسسٹ‘ یا انقلابی ادارہ نہیں ہے لیکن اس کی تازہ رپورٹ کے مطابق ''ملک کی عدالتوں میں 18لاکھ مقدمات التوا کا شکار ہیں۔ قانون اور اس کے نفاذ کے درمیان خلیج کی وجہ سے جرائم اور مجرموں کو سزا نہ ملنے کی شرح بڑھ رہی ہے۔ عدالتی اور قانونی اصلاحات کی کوئی کوشش نظر نہیں آتی۔ مقننہ کا رجحان ایسے قوانین کے اجرا کی طرف ہے جو ریاستی گرفت کو عوام کے حقوق اور آزادیوں کے حوالے سے سخت کر رہے ہیں۔‘‘وکیلوں کی فیس ہو یا دوسرے ''پوشیدہ اخراجات‘‘، انصاف کی قیمت آبادی کی اکثریت کی پہنچ سے ویسے ہی کوسوں دور ہوچکی ہے۔
سپریم کورٹ میں جاری اس مباحثے کا اہم پہلو یہ ہے کہ مذہبی یا لبرل دایاں بازو اور سرمایہ دار طبقات آج بھی اس سوشلزم سے خوفزدہ نظر آتے ہیں جسے کارپوریٹ میڈیا پچھلے 25سالوں سے مردہ قرار دے رہا ہے۔ شاید اندر ہی اندر وہ اچھی طرح جانتے ہیں کہ جبر و استحصال کے خلاف محنت کش عوام کی بغاوت کا خطرہ پہلے سے کہیں زیادہ موجود ہے۔ تاہم المیہ یہ ہے کہ آئین میں سوشلسٹ نکات متعارف کروانے کا الزام جس پیپلز پارٹی پر لگایا جارہا ہے اس پر براجمان ٹولہ سامراج، حکمران طبقے اور اسٹیبلشمنٹ کے ساتھ مل کر، محنت کش عوام کے خلاف صف آرا ہے۔ یہ مظہر صرف پاکستان تک ہی محدود نہیں‘ سوشل ڈیموکریسی اور ''کمیونسٹ‘‘ پارٹیاں، یورپ سے لے کر چین تک نیو لبرل سرمایہ داری کے آگے سر تسلیم خم کئے ہوئے ہیں۔ یہ سب کچھ ''انسان صفت سرمایہ داری‘‘ اور ''مارکیٹ سوشلزم‘‘ کے نام پر کیا جارہا ہے اور محنت کش طبقہ برباد ہو رہا ہے۔ لیکن ان روایتی پارٹیوں کے رہنما عوام کو ہمیشہ دھوکا نہیں دے سکتے۔ صنعت اور سماج سے بغاوت کے نئے ریلے سیاست میں داخل ہورہے ہیں۔ یونان میں PASOK، سپین میں PSOE، فرانس میں PSFکا انہدام اور برطانیہ میں لیبر پارٹی کی شکست واضح کرتی ہے کہ محنت کش طبقہ اور نوجوان دہائیوں پر مبنی متروک سیاسی روایات کو یکسر مسترد کر رہے ہیں۔
بینظیر بھٹو ہوں یا آصف علی زرداری، 1980ء کے بعد سے پیپلز پارٹی کی ہر حکومت نے پارٹی کے بنیادی سوشلسٹ منشور سے کھلا انحراف کیا ہے۔ حکمران طبقے اور امریکی سامراج کے ساتھ پارٹی قیادت کی ''مصالحت‘‘ آج تمام حدیں عبور کر چکی ہے۔ اس سلسلے میں تازہ ترین پیش رفت نواز لیگ کی جانب سے اسمبلی میں پیش کئے جانے والے ایک بل کی حمایت ہے جس کے ذریعے گیس کی قیمتوں میں مزید 145ارب روپے کا ٹیکس شامل کیا جارہا ہے۔یہ بل منگل کو پاس ہوا ہے۔ پیپلز پارٹی کے نمائندگا ن نے سیشن کے پہلے مرحلے میں بل پر خوب گرما گرم بحث کی اور اسے وفاق کو کمزور کرنے کی سازش قرار دیا لیکن جب ووٹنگ کی باری آئی تو اپوزیشن تحریک انصاف، ایم کیو ایم اور جماعت اسلامی کو سونپ دی گئی۔ دوپہر میں سیشن کے دوسرے حصے کے دوران پیپلز پارٹی کے نوید قمر صاحب نے فرمایا کہ بل پر پیپلز پارٹی کے ''تحفظات‘‘ حکومت نے کچھ ترامیم کے ذریعے دور کر دئیے ہیں۔ذرائع کے مطابق آصف زرداری اور نواز شریف کے درمیان معاملہ اس ساری تمثیل سے قبل ہی طے پاچکا تھا۔
پیپلز پارٹی کی عوام میں مقبولیت اگرچہ گزشتہ تین دہائیوں سے ہی مسلسل گراوٹ کا شکار تھی لیکن گزشتہ کچھ سالوں سے عوام کی طرف پارٹی قیادت کا رویہ ناقابل برداشت حد تک متکبرانہ ہو چکا ہے۔ کم و بیش ہر سیاسی تجزیہ نگار کے نزدیک پارٹی حتمی زوال اور انہدام کی طرف گامزن ہے‘ لیکن سوال یہ ہے کہ عوام کے پاس متبادل سیاسی قوت کون سی ہے؟ حالات جس قدر پیچیدہ اور بحران جتنا شدید ہے اس کے پیش نظر کئی طرح کے ممکنات موجود ہیں‘ لیکن بالکل واضح پیشین گوئی ابھی ممکن نہیں۔ ٹراٹسکی نے اسی طرح کی صورتحال کا تجریہ کرتے ہوئے کہا تھا کہ ''یہ طوفانی دور ہے؛ عوام بے چین ہیں؛ محنت کشوں کی سب سے باشعور پرت سمجھنے کی کوشش کر رہی ہے کہ ہو کیا رہا ہے؟ وہ پہلے سے موجود نعروں کی تکرار سے مطمئن نہیں ہوں گے۔ انہیں مکمل جواب درکار ہے۔‘‘ (27جنوری ، 1938ء)
محنت کش عوام کی نمائندہ متبادل سیاسی قوت کا انحصار اس بات پر ہے کہ پیپلز پارٹی کیسے اور کن بنیادوں پر ٹوٹ کر بکھرتی ہے۔ واقعات تیزی سے رونما ہو رہے ہیں اور اس سارے عمل میں فیصلہ کن کردار مارکسسٹ قوتوں کی تعمیر اور معروضی حالات یا ممکنہ انقلابی تحریک میں ان کی مداخلت کی صلاحیت کرے گی۔ آئین میں سوشلسٹ شقیں ڈال دینے سے سماج کی معاشی بنیادیں تبدیل نہیں ہوا کرتیں۔طبقاتی سماج میں قانون مکڑی کا جالا ہوتا ہے جس میں صرف کمزور ہی پھنستے ہیں۔آئین میں کتنی ہی انقلابی شقیں شامل کر لی جائیں، اس کی تشریح اور عمل درآمد حکمران ہی کرتے ہیں۔ جن دستاویزات کو عوام کے سامنے مقدس بنا کر پیش کیا جاتا ہے حکمرانوں کی نزدیک ان کی حیثیت کاغذ کے ٹکڑوں سے زیادہ نہیں ہوتی جنہیں بوقت ضرورت پھاڑ کر پھینکا جاسکتا ہے۔ محنت کش طبقے کی نجات کا تاریخی فریضہ صرف محنت کش طبقہ خود ہی ادا کرسکتا ہے۔بالشویک طریقہ کار، حکمت عملی اور تنظیمی ڈھانچوں پر مبنی انقلابی پارٹی ہی محنت کشوں اور نوجوانوں کی بغاوت کو درست راستہ فراہم کر کے سرمایہ دارانہ نظام کو اکھاڑ پھینک سکتی ہے!

روزنامہ دنیا ایپ انسٹال کریں