یونان: عوام نے کشکول توڑ دیا

دہائیوں سے حکمرانوں کے کشکول توڑنے کے بیانات سن سن عوام کے کان پک گئے ہیں۔ انہیں اچھی طرح معلوم ہے کہ آئی ایم ایف جیسے سامراجی مالیاتی اداروں کے یہ کاسہ لیس، کارپوریٹ سرمائے کے کمیشن ایجنٹ ہیں جو اپنے آقائوں سے آنکھ ملا کر بات بھی نہیں کر سکتے۔

سامراجی ڈاکہ زنی کا سب سے بڑا ہتھیار قرض اور سود در سود کا گھن چکر ہے‘ استحصال پر مبنی نظام کے حکمران اس چکر سے کبھی نہیں نکل سکتے۔ محنت کش طبقہ ہی ان لٹیروں کے سامنے سینہ سپر ہو سکتا ہے۔ یونان میں 5جولائی کے ریفرنڈم کے نتائج اس حقیقت کے گواہ ہیں۔ ریفرنڈم سے قبل ٹرائیکا(ساہو کاروں کا ٹولہ جس میں آئی ایم ایف، یورپی کمیشن، یورپی مرکزی بینک شامل ہیں)، یورپ کے سرمایہ داروں اور اس نظام کے دوسرے حواریوں نے اپنے کارپوریٹ میڈیا کے ذریعے یونان کے عوام کو کھلی دھمکیاں دی تھیں کہ ان کے احکامات کے خلاف ووٹ نہ ڈالیں۔ اسی طرح کی ایک پراپیگنڈا مہم اس سال جنوری کے عام انتخابات میں بھی چلائی گئی تھی جس میں عوام کو نجکاری اور تنخواہوں، پنشن اور ریاستی سہولیات میں کٹوتیوں (آسٹیریٹی) کے ''فضائل‘‘ گنوائے گئے تھے۔ عوام نے اس ریفرنڈم کی ہی طرح تب بھی تمام تر دھونس اور فریب کو رد کرتے ہوئے بائیں بازو کی ایک نومولود قوت 'سائریزا‘ کو کامیابی دلائی تھی۔ ان انتخابات میں دہائیوں سے عوام کی سیاسی روایت سمجھی جانے والی سیاسی جماعت PASOKکو بری طرح شکست ہوئی، PASOKکا کردار یونان میں کم و بیش وہی بن گیا تھا جو یہاں پیپلز پارٹی کا بن چکا ہے۔

سائریزا کی فتح نے پورے یورپ میں سیاسی زلزلہ پیدا کیا لیکن انتہائی بائیں بازو کی لفاظی کے باوجود پارٹی قیادت کے پاس کوئی ٹھوس انقلابی پروگرام نہیں تھا۔ الیکسز سپراس اور اس کی ٹیم برسر اقتدار آ کر بائیں بازو کی اصلاح پسندی کی مخصوص سوچ کے تحت آئی ایم ایف اور دوسرے قرض دہندگان سے 'رحم‘ کی بھیک مانگتے رہے۔ لیکن سرمائے کے نظام میں سرمائے کی منطق ہی چلتی ہے، سرمایہ دار اور سود خور اگر ''انسانی ہمدردی‘‘ کے تحت ''اچھے‘‘ ہو جائیں تو دوسرے دن کنگلے ہو کر سڑک پر آ جائیں گے۔گھوڑا گھاس سے دوستی نہیں کر سکتا۔ یہ ایک تلخ حقیقت ہے ‘استحصال پر مبنی اس نظام کو ''ٹھیک‘‘ کرنے کے شوقین اصلاح پسند اس کا ادراک کرنے سے انکاری ہیں۔

سائریزا کی قیادت اوپر سے مفاہمت کی سرتوڑ کوششیں کرتی رہی لیکن نیچے سے عوام کے دبائو کی وجہ سے جزوی مزاحمت پر بھی مجبور تھی۔ ٹرائیکا کے قرض دہندگان بضد تھے کہ اگر معیشت کو زندہ رکھنے کے لئے مزید قرض چاہئے تو ریاست تمام اثاثوں کی نجکاری کرے، عوام کو حاصل روزگار، صحت اور تعلیم وغیرہ کی تمام سہولیات کا خاتمہ کیا جائے، پنشن اور تنخواہیں مزید کم کی جائیں،بالواسطہ ٹیکسوں میں مزید اضافہ کیا جائے۔ سائریزا کی قیادت کے لئے یہ اقدامات سیاسی خود کشی کے مترادف تھے کیونکہ انہی کے خلاف نعرے لگا کر وہ برسر اقتدار آئے تھے۔ ڈیڈ لاک کھلنے کے امکانات نہ تھے چنانچہ سائریزا حکومت نے قرض دہندگان کی شرائط سے متعلق ریفرنڈم کا اعلان کر دیا۔

رعونت سے بھرے یورپی حکمرانوں کے نزدیک یہ ناقابل معافی گستاخی تھی۔ انہوں نے دھونس، خوف اور عدم استحکام کا ہر حربہ استعمال کیا۔ یورپی بینک نے یورو کرنسی کی سپلائی منقطع کرکے یونانی حکومت کو مجبور کر دیا کہ بینک کچھ دنوں کے لئے بند کرے اور اے ٹی ایم پر 60یورو روزانہ کی حد لگائی جائے۔ کارپوریٹ میڈیا پر طوفان بد تمیزی برپا تھا کہ اگر عوام نے ٹرائیکا کی منشا کے خلاف ووٹ ڈالا تو برباد ہو جائیں گے، ان کی جمع پونجی لٹ جائے گی، بھوکے مر جائیں گے۔ یونان کے حکمران طبقے اور دائیں بازو کے سیاسی جغادری بھی میدان میں لائے گئے اور قرض دہندگان کی ''شرائط کے پیکج‘‘ کے حق میں ''ہاں‘‘ ووٹ کی بھرپور مہم چلائی گئی۔نام نہاد ''سروے‘‘ کروا کے پرپیگنڈا کیا گیا کہ عوام کی اکثریت ''ہاں‘‘ کو ہی ووٹ ڈالے گی۔ لیکن جیسا نیم انقلابی یا انقلابی کیفیات بھی ہوتا ہے کہ عوام جب حرکت میں آتے ہیں تو سرمائے کی بڑی سے بڑی چالبازیاں نامراد ہو جاتی ہیں۔

5جولائی کی رات آنے والے ریفرنڈم کے نتائج کارپوریٹ میڈیا اور ان کے سامراجی آقائوں کے منہ پر تھپڑ سے کم نہیں تھے۔ تمام تر جعلی قیاس آرائیوں کے بر عکس 61.3فیصد لوگوں نے OXIیا ''ناں‘‘ پر مہر لگا کر ٹرائیکا کی تمام شرائط کو مسترد کر دیا۔ ''ہاں‘‘ کو صرف 38.7فیصد ووٹ پڑے۔ اس ریفرنڈم نے یونان میں کئی سالوں سے جاری انقلابی تحریک میں نئی روح پھونک دی ہے۔ ووٹنگ سے قبل جمعہ 3جولائی کو ایتھنز کے مرکزی چوک میں تین لاکھ سے زائد افراد نے ٹرائیکا کے خلاف احتجاج کیا جسے پچھلی کئی دہائیوں میں یونان کا سب سے بڑا سیاسی اجتماع قرار دیا جارہا ہے ۔ ریفرنڈم کے بعد دائیں بازو کی اپوزیشن کا سب سے بڑا رہنما 'سماراس‘ استعفیٰ دے کر سیاست سے ہی دستبردار ہو گیا۔ ہر طرف ''سوشلزم‘‘ اور ''زنجیروں کو توڑڈالو ‘‘ کے نعرے بلند ہو رہے تھے۔

لیکن یہ جوش و ولولہ لمبے عرصے تک اسی حالت میں برقرار نہیں رہ سکتا۔ یونان میں طبقاتی جنگ کی صفیں بالکل سیدھی ہو چکی ہیں۔ سیاسی تفریق 50سال بعد دائیں اور بائیں بازو کی شکل میں اتنی واضح ہوئی ہے کہ صورتحال ونزویلا سے خاصی مماثلت رکھتی ہے۔ عوام نے تو اپنا فیصلہ سنا دیا ہے، وہ اس نظام سے نفرت کرتے ہیں اور لڑنے کو تیار ہیں۔ سوال اب یہ ہے کہ سائریزا کی حکومت کیا کرتی ہے۔ پارٹی کی قیادت اصلاح پسندوں کے پاس ہے لیکن تنظیمی اداروں اور عام کارکنان میں انقلابی سوشلسٹ بھی بڑی تعداد میں موجود ہیں۔ پارٹی میں بائیں بازو کی اپوزیشن کا سب سے منظم اظہار ''سائریزا کا کمیونسٹ رجحان‘‘ ہے۔

سائریزا کی قیادت سمجھ رہی ہے کہ اس ریفرنڈم کے ذریعے ٹرائیکا کے ساتھ مذاکرات میں ان کا پلہ بھاری ہو گیا ہے جو سراسر خوش فہمی اور حماقت ہے۔یہ چھٹے ہوئے ساہو کار اپنی روش سے ہٹنے والے نہیں۔ انہوں نے ریفرنڈم کے بعد مالیاتی بلیک میلنگ زیادہ بڑھا دی ہے۔ ٹرائیکا کو درست طور پر ''دہشت گرد‘‘ قرار دینے والے یونان کے وزیر خزانہ 'یانس واروفاکس‘ کو مستعفی ہونا پڑا کیونکہ قرض دہندگان اسے مذاکرات کی میز پر برداشت کرنے کو تیار نہیں تھے، یہ سائریزا حکومت کی ایک اور پسپائی ہے۔ سائریزا کی قیادت کو شاید اندازہ نہیں ہے کہ وہ ایک قدم پیچھے ہٹیں گے تو ٹرائیکا انہیں دس قدم پیچھے ہٹنے پر مجبور کرے گا۔

یہ کیفیت صرف یونان تک محدود نہیں ہے۔ سپین، اٹلی، پرتگال، آئر لینڈ سمیت کئی یورپی ممالک کی معاشی کیفیت زیادہ مختلف نہیں ہے۔ لیکن یونان ایک 'فوکل پوائنٹ‘ بنا ہوا ہے اور پورے یورپ کے نوجوان اور محنت کش یونان کے عوام کے ساتھ اظہار یکجہتی کے لئے مظاہرے کر رہے ہیں۔ یونان میں ہونے والی پیش رفت کے سیاسی اور معاشی نتائج پورے یورپ پر مرتب ہوں گے۔ ٹرائیکا اگر معاشی ناکہ بندی بڑھا کر یونان کے عوام کو مزید نڈھال کرنے کی کوشش کرتا ہے تو الٹ نتائج برآمد ہو سکتے ہیں اور تحریک زیادہ شدت سے پھٹ سکتی ہے۔ اسی طرح یونان کو یورو زون یا یورپی یونین سے نکالنا بھی اتنا آسان نہیں ہے، اس سے ساہوکاروں کے قرضے ڈوب جائیں گے۔ مزید برآں دوسرے ممالک کے عوام بھی معاشی ذلت پر ڈیفالٹ ہونے کو ترجیح دیں گے، پورے یورپ میں یورو مخالف جذبات پہلے ہی بھڑک رہے ہیں۔ لیکن ٹرائیکا کوئی رعایت بھی نہیں دے سکتا کیونکہ قرضوں میں ڈوبی دوسری ریاستیں بھی اس کا مطالبہ کریں گی۔ سائریزا حکومت پہلے ہی بہت ''لچک‘‘ اور پسپائی کا مظاہرہ کر چکی ہے لیکن سود خور بھیڑئیے عوام کے خون کا آخری قطرہ بھی چوس لینا چاہتے ہیں۔

نیولبرل اور نہ ہی 'کینشین اسٹ‘ سرمایہ داری کی بنیادوں پر یونان کی کوئی نجات ممکن ہے۔سرمایہ داری میں ''فلاحی ریاست‘‘ اب قصہ ماضی ہو چکی ہے۔ آگے بڑھنے کا واحد راستہ پورے یورپ کے عوام سے یکجہتی کی اپیل کرتے ہوئے سوشلسٹ بنیادوں پر یونان کی یورو زون اور یورپی یونین سے علیحدگی ہے۔ بینکنگ اور مالیاتی اثاثوں سمیت معیشت کے کلیدی شعبے نیشنلائز کر کے ہی عوام سے اب تک چھینی گئی روزگار، تعلیم، علاج، رہائش جیسی تمام سہولیات کہیں احسن طریقے سے فراہم کی جا سکتی ہیں۔اگر یہ انقلابی اقدامات بروقت نہیں کئے جاتے تو معاشی بحران شدت پکڑ سکتا ہے اور سائریزا حکومت اپنی ساکھ کھو کر معزول ہوسکتی ہے۔ اس صورت میں پارٹی بھی اصلاح پسندوں اور انقلابی سوشلسٹوں کے درمیان پھوٹ کا شکار ہو جائے گا۔ دائیں بازو اور فاشزم کی قوتیں بہرحال بہت کمزور ہیں۔

یونان کے محنت کشوں اور نوجوانوں نے جس انقلابی جرات اور حوصلے کا مظاہرہ کیا ہے وہ دنیا بھر کے عوام کے لئے مشعل راہ ہے۔ یہ نئے عہد کا آغاز ہے جو انقلابی سوشلزم کے ذریعے نسل انسان کی آزادی اور نجات کے راستے کھولے گا!