آشوبِ آرزو

وقارخان

feedback: feedbackcol@dunya.com.pk

تاریخ اشاعت 2017-03-10

الیکٹرانک کاپی

پرنٹ کریں

الیکٹرانک کاپی

تعلیم بالغاں کا کلاس روم

ماسٹر صاحب: (کلاس میں داخل ہوتے ہوئے ) کیا سارے بالغ پہنچ گئے ہیں؟

شیرو مستانہ: کلاس میں تو پہنچ گئے ہیں ، بلوغت کو نہیں پہنچے ۔

ماسٹر صاحب: خاموش...بال سفید ہو گئے ، ابھی بلوغت کو نہیں پہنچے کم بخت ۔

فیقا ٹیڈی: ابھی تو ملک چلانے والے بالغ نہیں ہوئے ماسٹر جی ! ہم کیسے ہو گئے (قہقہہ)

شیدا جہاز: ماسٹر جی ! یہ پھٹیچر کھلاڑی کیا ہوتا ہے ؟

خانو خاکسار: یہ بالکل پھٹیچر لیڈر جیسا ہوتا ہے (قہقہہ)

ماسٹر صاحب: خاموش ہو جائو سب اور اپنے سبق پر دھیان دو ...ہاں تو پیارے بالغو ! کل ہم نے فعل اور اس کی اقسام پڑھی تھیں۔ گامے تم بتائو کہ فعل کسے کہتے ہیں؟

گاما کوچوان: کرتوتوں کو فعل کہا جاتاہے۔ انتخابات میں جھرلو پھیرنا بھی ایک فعل ہے اور لوڈ شیڈنگ کرنا بھی۔

خیرو بھاگوان: دھرنا دینا بھی ایک فعل ہے اور کھوکھلے نعروںکی جگالی کرنا بھی۔

جمالا شرمسار: عوام تک بنیادی سہولتیں پہنچانے میں فیل ہونا بھی ایک فعل ہے اور اس میں سارے کے سارے ہی فیل ہیں(قہقہہ)

ماسٹر صاحب : غلط ، بالکل غلط تعریف ہے فعل کی ۔ تم لوگ کچھ بھی پڑھ کر نہیں آئے ۔اچھا نورے تم فعل ماضی اور اس کی اقسام بیان کرو۔

نورا دیوانہ: فعل ماضی سے مراد ماضی کے کارنامے بھی ہو سکتے ہیں اور کرتوت بھی ۔

فیقا ٹیڈی: ایک قسم داغ داغ ماضی بھی ہے (قہقہہ)

خانو خاکسار: سب سے مشہور قسم شاندار ماضی ہے ۔ جس قوم کا مستقبل تاریک ہو وہ اس صیغے کا کثرت سے استعمال کرتی ہے (قہقہہ)

ماسٹر صاحب: ارے کم بختو ! لغویات بکنے کے علاوہ بھی تمہیں کوئی کام آتا ہے کیا؟ میں کہتا ہوں سنجیدہ ہو جائو ،ورنہ بہت پچھتائو گے ۔

فیقا ٹیڈی: ابھی تو ملک چلانے والے سنجیدہ نہیں ہوئے ، ہم کیوں ہوں ماسٹر جی (قہقہہ)

ماسٹر صاحب : ابے تو ملک چلانے والوں کے پیچھے کیوں پڑگیا ہے ۔ اپنی چونچ بند رکھ ...ہاں ! شیدے تم فعل ماضی کا کوئی جملہ سنائو ۔

شیدا جہاز: ہم پاکستان بنانے کے گناہ میں شریک نہیں تھے (قہقہہ)

ماسٹر صاحب: تُف ہے تم پر ۔ خانوتم بتائو کہ فعل حال کسے کہا جاتا ہے ؟

خانو خاکسار:ـفعل حا ل کو مندا حال بھی کہتے ہیں ۔ ناکے، ڈاکے ، دھماکے ، فاقے ، کاکے اور اندھیرے سب فعل حال ہیں۔

ماسٹر صاحب: شاوش ہے بھئی ، شاوش اے ...اچھا تم میں سے کون فعل حال کا کوئی جملہ بنائے گا؟

خیرو بھاگوان: ہم ایک ایسے دور میںجی رہے ہیں ، جہاں جھوٹ کی حکمرانی ہے (قہقہہ)

ماسٹر صاحب: یہ فعل حال نہیں ہے بے وقوف۔ جمالے تم فعل حال کا کوئی خوبصورت سا جملہ سنائو ۔

جمالا شرمسار: سنیں ...میں ملک ہوں کسی اور کا ، مجھے چلاتا کوئی اور ہے ۔

ماسٹر صاحب: بند کرو یہ واہیات باتیں ۔غور سے سنو ، میں ایک جملہ سناتا ہوں،تم لوگ بتائو کہ یہ کس زمانے کا فعل ہے ... ''بندر اچھل اچھل کر شاخیں بدل رہے ہیں‘‘

شیدا جہاز: کیا کہابندر اچھل اچھل کر پارٹیاں بدل رہے ہیں؟

ماسٹر صاحب: پارٹیاں نہیں جاہل۔ شاخیں ، شاخیں ...بندر پارٹیاں نہیں بدلتے ۔

نورا دیوانہ: تو پھر کون پارٹیاں بدلتے ہیں ماسٹرجی!

ماسٹر صاحب:کوئی بھی پارٹی نہیں بدلتا یہاں ...کیوں میری نوکری کے پیچھے پڑ گئے ہو کم بختو ۔ فضول باتیں مت کرو اور بتائو کہ فعل مستقبل کیا ہوتا ہے ؟

شیرو مستانہ: مستقبل تو مشغلہ بازوں کی بھینٹ چڑھ گیا ماسٹر جی (قہقہہ)

ماسٹر صاحب: آفریں ہے بھئی ۔ میں فعل مستقبل کی بات کرر ہا ہوں اور تمہیں مستقبل کی فکر پڑ گئی ہے ۔

جمالا شرمسار: مستقبل کی فکر کرنی چاہیے ماسٹر جی ! آپ ہی تو کہتے ہیں ۔

ماسٹر صاحب: کہتا ہوں ، ضرور کہتا ہوں اورپھر کہہ رہا ہوں کہ دیکھو میرے بچو ! اب تم سب بالغ ہو ۔ اپنے آنے والے سالوں کے بارے میں سوچو۔

گاما کوچوان: میں تو اپنے آنے والے سالوں کے بارے میں سوچ سوچ کر پریشان ہوں ماسٹر جی ۔ میرے اکٹھے تین سالے اگلے ہفتے میرے گھر میں رہنے کے لیے آ رہے ہیں۔

ماسٹر صاحب : ابے جاہل ! میرا مطلب ہے کہ آنے والے برسوں کے بارے میں سوچو۔

شیدا جہاز: ہم تو آنے والے کل کا نہیں سوچتے ، برسوں کی کیا اوقات ہے بھلا(قہقہہ)

شیرو مستانہ: ماسٹر جی آپ مستقبل کے بارے میں سوچنے کو کہہ رہے ہیں مگر میرا ماما کہتا ہے کہ سوچنے سے صحت خراب ہوتی ہے ۔

فیقا ٹیڈی : ویسے بھی ماسٹر جی ! ہمارے ہاں سوچنے کا رواج ہی نہیں ۔ اب دیکھیں ناں، جب ملک چلانے والے نہیں سوچتے تو ہم کیوں یہ جھک ماریں ؟

ماسٹر صاحب : خبردار فیقے جو تو نے آئندہ ملک چلانے والوں کے بارے میں ہرزہ سرائی کی تو ۔ کیوں میری روزی کے پیچھے پڑ گیا ہے بے شرم...دیکھو بالغو!تمہیں سنجیدگی سے سوچنا چاہیے کہ بہتر مستقبل کے لیے کون سے راستے پر چلنا ہے ؟

خیرو بھاگوان: پہلے منزل کا تعین ہو تو پھر راستہ چنا جاتا ہے ماسٹرجی (قہقہہ)

ماسٹر صاحب: ارے کم بختو بات فعل مستقبل کی ہو رہی ہے اور تمہاری گز گز بھر زبانیں کہاں جا پہنچیں۔ جمالے ، تم سنجیدگی سے فعل مستقبل کے بارے میں بتائو

جمالا شرمسار: مستقبل اور سنجیدگی ؟(قہقہہ)

ماسٹر صاحب : خاموش ...پھر اپنی اصلیت پر آ گئے تم...خانو تم بولو ۔

خانو خاکسار: فعل مستقبل کا مطلب ہوتا ہے آج کا کام کل پر چھوڑنا۔ جیسے '' کالا باغ ڈیم ضرور بنائیں گے ‘‘

نورا دیوانہ: فعل مستقبل جمہوریت کا ایجاد کردہ فعل ہے ۔ یہ کر دوں گا ، وہ کر دوں گا ...گا،گی ،گے ...اس کو سبز باغ دکھانا بھی کہتے ہیں۔

ماسٹر صاحب: غلط، سب غلط ۔ میرا دل کرتا ہے کہ بڑا سا گڑھا کھودوں اور تم سب کو اس میں دھکا دے کر اوپر مٹی ڈال دوں۔

فیقا ٹیڈی: زحمت نہ کریں ماسٹر جی ! ہم پہلے ہی زندہ درگور ہیں (قہقہہ)

ماسٹر صاحب: اچھا اب بس کرو اور شیرو تم فعل ماضی قریب کی تعریف کرو۔

شیرو مستانہ: ماضی قریب تعریف کے قابل کہاں ہے ماسٹر جی ! اعلیٰ عدالتوں میں دو بوتلوں جیسے ایشو پر بحث ہوتی رہی ہے ۔

ماسٹر صاحب : تم سے یہی امید تھی ۔ خیرو تم فعل ماضی بعید کی تعریف کرو۔

خیرو بھاگوان: ماضی بعید کے فعل تو اور بھی زیادہ شرمنا ک ہیں ماسٹر جی ! مارشلائوں اور ایمرجنسیوں والے ماضی کی تعریف کرنا تو سفید جھوٹ ہوگا(قہقہہ)

ماسٹر صاحب: گامے تم فعل ناقص کے بارے میں بتائو؟

گاما کوچوان: یہ وہ فعل ہے جس میں ٹھیکیدار سرکاری کام میں گھپلا کرتا ہے اور ناقص میٹریل استعمال کرتا ہے ۔ اس فعل میں سب مل کر کھاتے ہیں،پھر بھی اسے فعل ناقص کہا جاتا ہے ، خدا جانے کیوں؟

ماسٹر صاحب : جھوٹ ، سب جھوٹ ۔ ارے جاہلو کبھی سچ بھی بول لیا کرو۔

فیقا ٹیڈی: ماسٹر جی ! سچ تو کبھی ملک چلانے والوں نے ...

ماسٹر صاحب : (جوتا اتار کر فیقے کی طرف لپکتے ہوئے ) ارے کم بخت ، ناہنجار، بے حیا ، پھٹیچر...تیرا بگاڑا کیا ہے ملک چلانے والوں نے ؟ ...ٹھہر تیری خبر لیتا ہوں...!

روزنامہ دنیا ایپ انسٹال کریں