کیکر سیم ، تھور اورکلر زدہ زمین پر اگ سکتا ہے :محکمہ زراعت
ایک پاؤ بیج کی درست انداز میں کاشت سے ایک ہزارپودوں کو پروان چڑھایا جا سکتا ہے موسم برسات کے دوران کیکر کی بوائی مثبت اثرات کی حامل ہوگی اور ایک پاؤ بیج کی درست انداز میں کاشت سے کیکر کے ایک ہزارپودوں کو پروان چڑھایا جا سکتا ہے
فیصل آباد(اے پی پی) تاہم اس کیلئے لازم ہے کہ بوائی سے 48گھنٹے قبل کیکر کے بیج کو ٹھنڈے پانی میں ڈبو کر رکھ دیا جائے یا گرم پانی میں ڈال کر پانی کو آہستہ آہستہ ٹھنڈا ہونے دیا جائے تاکہ بیج بوائی کے بعد بھر پور فصل دینے کے قابل ہو سکے ۔ محکمہ زراعت فیصل آباد ڈویژن کے ترجمان نے بتایاکہ کیکر یا ببول پنجاب کے میدانی علاقوں میں کاشت کیا جانے والا سدا بہار درخت ہے جو خشک اور بنجر زمینوں میں نارمل موسمی حالات کے دوران خود بخود بھی اگ آتا ہے ۔یہ درخت موسمی حالات کے خلاف بہت زیادہ قوت مدافعت کا حامل ہوتا ہے لہذا شدید گرمی ، پانی کی زیادتی اس کی نشو و نما پر اثر انداز نہیں ہو سکتی۔کیکر کی خاصیت یہ بھی ہے کہ یہ نہ صرف سیم ، تھور ، کلر زدہ زمین پر اگ سکتا ہے بلکہ زمین کی اصلاح بھی کرتا ہے ۔
