ایس ای سی پی:ایک ماہ میں 3ہزار سے زائد کمپنیوں کی شمولیت
کراچی(بزنس رپورٹر )سیکیورٹیز اینڈ ایکسچینج کمیشن آف پاکستان نے ایک تاریخی سنگ میل حاصل کرلیا، جس میں ایک ہی مہینے میں سب سے۔
زیادہ 3,442 کمپنیوں کی شمولیت کی گئی ہے جو پچھلے سال کے ماہانہ اوسط کے مقابلے میں 39 فیصد اضافے کو نمایاں کرتی ہے ،یہ بے مثال کامیابی پاکستان میں کاروباری ماحول کو بہتر بنانے اور کاروباری آسانی کو فروغ دینے کے لیے ایس ای سی پی کے عزم کی عکاسی کرتی ہے ۔ایس ای سی پی کے مطابق جنوری 2025 کے دوران ایس ای سی پی نے مختلف شعبوں میں کمپنیوں کو رجسٹر ڈ کیا، جن میں کلیدی صنعتوں کی بڑی تعداد شامل تھی۔ انفارمیشن ٹیکنالوجی اور ای کامرس شعبوں میں سب سے زیادہ اضافہ ہوا، 652 نئی کمپنیاں شامل کی گئیں۔ تجارت کے شعبے میں 463 نئی کمپنیاں، خدمات کے شعبے میں 411 نئی کمپنیاں، رئیل اسٹیٹ ترقی اور تعمیرات میں 311 نئی کمپنیاں شامل ہوئیں۔ سیاحت اور ٹرانسپورٹ میں 242، خوراک اور مشروبات میں 158، صحت اور فارماسوٹیکل میں 233، ایندھن اور توانائی میں 81، تعلیم میں 124، کان کنی اور پتھر کاری میں 119، مارکیٹنگ اور اشتہار میں 86، ٹیکسٹائل میں 79، کارپوریٹ زرعی فارمنگ میں 73 نئی رجسٹریشنز شامل ہوئیں۔ دیگر شعبوں میں آٹو اور متعلقہ، بجلی کی پیداوار، کھیل اور متعلقہ، تمباکو وغیرہ شامل ہیں جن میں 650 نئی کمپنیاں شامل ہیں ۔ایس ای سی پی کے مطابق کل نئی رجسٹریشنز میں سے 58 فیصد نجی کمپنیوں کی تھیں، جبکہ 38 فیصد سنگل ممبر کمپنیوں کی تھیں۔ باقی 4فیصد غیر درج شدہ کمپنیوں، غیر منافع بخش تنظیموں، تجارتی تنظیموں اور ایل ایل پیز پر مشتمل تھیں۔
