ڈالر کی قدر میں 54پیسے کمی ،تو لہ سونا 5900روپے سستا
کراچی (بزنس رپورٹر)انٹربینک میں جمعرات کو روپے کے مقابلے ڈالر کی قیمت میں بڑی کمی ریکارڈ کی گئی۔ادھرعالمی و مقامی مارکیٹوں میں سونے کی قیمتوں میں بھی نمایاں کمی ریکارڈ کی گئی۔
اسٹیٹ بینک کے مطابق کاروباری ہفتے کے چوتھے روز انٹربینک میں امریکی کرنسی کی قیمت میں 54پیسے کی کمی ریکارڈ کی گئی جس کے باعث انٹربینک میں ڈالر 284 روپے 22 پیسے پر بند ہوا۔واضح رہے کہ گزشتہ روز انٹربینک میں ڈالر 284 روپے 76 پیسے پر بند ہوا تھا۔ عالمی بلین مارکیٹ میں سونا 61 ڈالر کی نمایاں کمی سے 3363 ڈالر فی اونس کا ہوگیا۔بین الاقوامی مارکیٹ میں سونے کے نرخ میں کمی کے باعث مقامی سطح پر بھی فی تولہ سونا 5 ہزار 900 روپے کی بڑی کمی سے 3 لاکھ 59 ہزار روپے کا ہوگیا۔اسی طرح دس گرام سونے کی قیمت 5 ہزار 58 روپے کی کمی سے 3 لاکھ 7 ہزار 784 روپے ہوگئی۔دریں اثنا چاندی کی فی تولہ قیمت 24 روپے کی کمی سے 4057 روپے تک پہنچ گئی۔
