جیٹ گرین ایئرلائن آپریشنل تیاری کے مرحلے میں داخل
10سال سے زیرِ التوا کاشکار تھی، منصوبے کی مالیت 30ملین ڈالر، رپورٹ
اسلام آباد(آئی این پی)10 سال سے زیرِ التوا جیٹ گرین ایئرلائن آپریشنل تیاری کے مرحلے میں داخل ہوگئی، اس منصوبے کی مالیت 30 ملین ڈالر ہے۔ رپورٹ کے مطابق خصوصی سرمایہ کاری سہولت کونسل کی موثر حکمت عملی اور سہولت کاری کے نتیجے میں پاکستان کے ہوابازی کے شعبے میں ایک بڑی سرمایہ کاری حقیقت بننے جا رہی ہے۔ نجی ایئرلائن منصوبہ جیٹ گرین تمام قانونی رکاوٹیں دور ہونے کے بعد اب آپریشنل تیاری کے مرحلے میں داخل ہو گیا ۔تقریباً ایک دہائی سے زیرِ التوا اس منصوبے کی مالیت 30 ملین ڈالر ہے ، ایس آئی ایف سی نے متعلقہ اداروں کے درمیان بہترین رابطہ کاری کے ذریعے لائسنسنگ، سیفٹی ویٹنگ اور کمرشل پرمٹس جیسے پیچیدہ مراحل کو نہ صرف تیز بنایا بلکہ شفافیت کے ساتھ مکمل بھی کیا۔ان رکاوٹوں کے خاتمے کے بعد جیٹ گرین پرائیویٹ لمیٹڈ اب اپنی پروازیں شروع کرنے کیلئے تیار ہے ۔نئی نجی ایئرلائن کی آمد سے پاکستان میں ہوابازی کے شعبے میں مثبت تبدیلیاں متوقع ہیں ، مسابقت بڑھنے سے سروس کے معیار میں بہتری آئیگی اور نجی سرمایہ کاروں کا اعتماد بحال ہوگا، جس سے مزید غیر ملکی سرمایہ کاری کی راہ ہموار ہوگی۔اس کے ساتھ ہی 30 ملین ڈالر کا یہ منصوبہ ملک میں روزگار کے نئے مواقع اور معاشی سرگرمیوں میں اضافے کا باعث بنے گا۔حکام کا کہنا ہے کہ ایس آئی ایف سی ملک میں کاروباری رکاوٹیں دور کرنے اور سرمایہ کاری کیلئے سازگار ماحول فراہم کرنے کے اپنے مشن پر کامیابی سے گامزن ہے۔
