پولیس افسران و جوانوں کو خراجِ تحسین پیش :ڈی پی اوجھنگ
جھنگ (ڈسٹرکٹ رپورٹر )ڈسٹرکٹ پولیس آفیسر جھنگ کیپٹن (ر)بلال افتخار کیانی نے کہا ہے کہ۔۔۔
محرم الحرام کے دوران منعقدہ مجالس و جلوسوں کا پُرامن انعقاد جھنگ پولیس، ضلعی انتظامیہ، پاک آرمی، رینجرز، ریسکیو 1122، امن کمیٹی، میڈیا اور دیگر اداروں کے مابین مربوط حکمتِ عملی اور شاندار اشتراکِ عمل کا مظہر ہے ،امن و امان کے قیام میں اہم کردار ادا کرنے والے تمام پولیس افسران و جوانوں کو دل کی اتھاہ گہرائیوں سے خراجِ تحسین پیش کرتے ہیں، دورانِ ڈیوٹی غیر معمولی کارکردگی کا مظاہرہ کرنیوالوں کو تعریفی اسناد دینگے ۔ ان خیالات کا اظہار انہوں نے جاری اپنے ایک بیان میں کیا۔ ڈی پی او جھنگ نے مزید کہا کہ پولیس فورس نے جس خلوص، عزم، پیشہ ورانہ مہارت اور حفاظت کے جذبے کے ساتھ عزاداروں کے تحفظ کو یقینی بنایا، وہ بلاشبہ قابلِ فخر اور لائقِ تقلید ہے ۔ شدید گرمی، حبس اور تھکن کے باوجود ہمارے افسران و اہلکاران چوکنا رہے اور جلوسوں و مجالس کے روٹس پر ہر لمحہ الرٹ رہ کر امن کے قیام کو یقینی بنایا۔ انہوں نے مزید کہا کہ جھنگ کے باسیوں نے ثابت کر دیا کہ یہ شہر صبر، اتحاد، رواداری اور باہمی احترام کی روشن مثال ہے ،آخر میں ڈی پی او نے اس امید کا اظہار کیا کہ یہی ہم آہنگی، یکجہتی اور خدمت کا جذبہ مستقبل میں بھی برقرار رہے گا تاکہ جھنگ کو امن و بھائی چارے کا استعارہ بنایا جا سکے ۔
