فیسکو سب ڈویژنز میں صارفین سے دھوکہ کیاجارہا :میاں طاہر
فیصل آباد(سٹاف رپورٹر)جماعت اسلامی کے راہنما وممبرامن کمیٹی میاں طاہر ایوب نے کہاہے کہ فیسکوکے سب ڈویژنز میں آن لائن شکایت کی صورت میں مسئلہ حل کئے بغیر ہی شکایت کو حل شدہ قرار دے کر صارفین سے دھوکہ کیاجارہاہے۔۔۔
بلوں پر شکایت کیلئے پرنٹ موبائل نمبر بھی غیر فعال ہیں، مسائل کے شکار صارفین پریشانی سے دوچارہیں،صارفین کی شکایات کو محض فائلوں میں نمٹانے کی روایت شدت اختیار کر چکی ہے ۔اپنے ایک بیان میں انہوں نے کہاکہ شہریوں کی جانب سے آن لائن یا فون کے ذریعے کی جانے والی شکایات کا ازالہ کرنے کے بجائے متعلقہ اہلکار بوگس انٹریز کے ذریعے ریکارڈ میں یہ ظاہر کردیتے ہیں کہ مسئلہ حل کر دیا گیا، حالانکہ زمینی حقائق اس کے برعکس ہیں۔ ایسے میں صارفین مسلسل بجلی کی خرابی، بلوں میں غلطیوں یا وولٹیج کی خرابی جیسے مسائل کا شکار رہتے ہیں مگر فیسکو کے نظام میں ان کی شکایات حل شدہ دکھائی دیتی ہیں۔ معلومات کے مطابق بیشتر سب ڈویژنز میں وہ موبائل نمبرز جو بجلی کے بلوں پر شکایت درج کرنے کے لیے فراہم کئے گئے تھے یا تو بند ملتے ہیں یا اٹینڈ ہی نہیں کئے جاتے ، صارفین کو شدید ذہنی اذیت کا سامنا ہے ۔انہوں نے مطابہ کیاہے کہ اعلیٰ انتظامیہ بوگس انٹریز اور غیر فعال شکایتی نیٹ ورک کا نوٹس لے اورمانیٹرنگ کیلئے کسی ادارے کی نگرانی میں آزادانہ آڈٹ کروایا جائے اور شہریوں کی شکایات کوبروقت نمٹایاجائے ۔
