زرعی یونیورسٹی میں منعقدہ پینٹنگ ورکشاپ اختتام پذیر
فیصل آباد(سٹاف رپورٹر)زرعی یونیورسٹی فیصل آباد میں منعقدہ پینٹنگ ورکشاپ اختتام پذیر ہو گئی، وائس چانسلر پروفیسر ڈاکٹر ذوالفقار علی کی ہدایت پر۔۔۔
فیکلٹی آف آرٹس اینڈ ہیومینیٹیز کے شعبہ آرٹ اینڈ ڈیزائن کے زیراہتمام پینٹنگ ورکشاپ کے اختتامی تقریب سے خطاب میں ماہرین نے کہا کہ ذاتی اور قومی ترقی کے لئے نوجوانوں میں تخلیقی صلاحیتوں اور فنون لطیفہ کو فروغ دینا ناگزیر ہے تاکہ معاشرے میں مثبت سوچ کو پروان چڑھاتے ہوئے اضطرابی کیفیت جیسے مسائل پر قابو پایا جا سکے ۔ اس موقع پر ڈین پروفیسر ڈاکٹر شازیہ رمضان، ڈپٹی رجسٹرار محمد آصف صدیق، ڈاکٹر کرن خالد، وردہ طارق اور دیگر نے بھی خطاب کیا۔ ڈاکٹر شازیہ رمضان نے کہا کہ موجودہ صورتحال میں جب لوگ ذہنی دباؤ کا شکار ہیں تو تخلیقی سرگرمیاں اور فنون لطیفہ وہ راستہ فراہم کرتے ہیں جس سے مختلف انداز میں سوچنے اور معاشرے میں امید پیدا کرنے کی راہ نکلتی ہے ۔ انہوں نے کہا کہ فن کے ذریعے کئی سماجی مسائل کو مثبت اور قابل عمل انداز میں حل کیا جا سکتا ہے ،اس طرح کی تربیتی ورکشاپس نئے خیالات، مہارتوں اور بصیرت کے سنہری مواقع فراہم کرتی ہیں۔ محمد آصف صدیق نے کہا کہ فن سوچ کے انداز کو وسیع کرتا ہے اور سماجی مسائل کا باریک بینی سے مشاہدہ کرنے کی طرف توجہ دلاتا ہے ،فنکار دنیا کو منفرد زاویوں سے دیکھنے اور زندگی کے مختلف پہلوؤں کا بغور مشاہدہ کرنے کی صلاحیت رکھتے ہیں۔ ان کا ویژن لوگوں کو ناامیدی اور محرومی کے احساسات سے نجات دلاتا ہے ۔ ڈاکٹر کرن خالد نے کہا کہ طلبہ کو اس طرح کے پلیٹ فارمز سے بھرپور فائدہ اٹھانا چاہیے ۔ وردہ طارق نے طلبہ کو اس طرح کی تخلیقی سرگرمیوں میں شرکت کی ترغیب دلائی۔
