یوم آ زادی پر قلعہ سیالکوٹ پر پرچم کشائی کی تقریب
سیالکوٹ(نمائندہ دنیا ،ڈسٹرکٹ رپورٹر )ضلع بھر میں جشن آزادی ملی جوش و جذبے کیساتھ منایا گیا، قلعہ سیالکوٹ پر پرچم کشائی کی پروقار تقریب ہوئی چاروں تحصیلوں میں حکومت پنجاب کی پلانٹ فار پاکستان مہم کے تحت شجرکاری کی گئی۔۔۔
اور ضلعی انتظامیہ، ایجوکیشن، ہیلتھ، سوشل ویلفیئر، فوڈ کنٹرولر،پنجاب فوڈ اتھارٹی،کوآپریٹوز، زراعت، جنگلات، وائلڈ لائف، فشریز،،لٹریسی، زکواۃ، بلدیاتی اداروں سمیت تمام محکموں کے افسر وں و اہلکاروں نے شجرکاری کی اورہزاروں پودے لگائے گئے ۔ شہر اقبال کے تاریخی قلعہ میں پرچم کشائی کی تقریب کے مہمانان خصوصی ڈپٹی کمشنر محمد ذوالقر نین ، ممبران صوبائی اسمبلی محمد منشا اﷲ بٹ، چودھری فیصل اکرام تھے ، ایڈیشنل ڈپٹی کمشنرز محمد اقبال، مظفر مختار سمیت اعلیٰ افسروں ، معززین شہر نے بھی تقریب میں بھرپور شرکت کی جبکہ پولیس ، سول ڈیفنس، ریسکیو1122کے دستوں نے قومی پرچم کو سلامی پیش کی۔ ڈپٹی کمشنر نے کہا کہ پاکستان عطیہ خداوندی ہے ، برصغیر کے مسلمان جو انگریز سامراج میں انتہائی کسمپرسی کی زندگی گزارنے پر مجبور تھے ، یہ آزادی کا ثمر ہے وطن عزیز میں ہمیں زندگی کے ہر میدان میں آگے بڑھنے میں تمام مواقع دستیاب ہیں۔
