پابندی کے باوجود پکی قبریں،میتوں کی تدفین محال

پابندی کے باوجود پکی قبریں،میتوں کی تدفین محال

گوجرانوالہ(نیوزرپورٹر)پابندی کے باوجود گوجرانوالہ کے قبرستانوں میں پکی قبریں بنانے کا سلسلہ جاری ہے جس سے قبرستانوں میں جگہ کم پڑتی جارہی ہے ، اندرون شہر کے قبرستانوں میں میتیں دفنانا محال ہوگیا ۔

قبرستانوں میں پکی قبریں بنانے پر پابندی عائد ہے اور یہ واضح ہدایات جاری کی گئی ہیں کہ اگر کوئی خلاف ورزی کرے اس کیخلاف لوکل گورنمنٹ ایکٹ کے تحت کارروائی کی جائیگی۔ قانون پرعمل درآمد کیلئے ہر قبرستان کا محافظ مقرر کیا گیا ہے جو کہ سرکاری ملازم ہے لیکن ان کی کارکردگی مایوس کن ہے ۔قبرستانوں میں روزانہ کی بنیادوں پر قبریں پکی جا رہی ہیں ، پکی ایک قبر تین قبروں کی جگہ گھیرتی ہے ۔بعض نے تو قبروں کے اطراف جنگلے اور ان کے ساتھ دروازہ بھی لگایا ہوا ہے ۔چمن شاہ قبرستان ،قبرستان کلاں شہر کے بڑے قبرستان ہیں جہاں اب تدفین کیلئے جگہ ملنا مشکل ہو گیا ہے ۔شہریوں کا کہنا ہے کہ بلدیہ کا کوئی اہلکار قبر پکی کرنے کے دوران کارروائی نہیں کرتا۔ شہریوں کا کہنا ہے کہ ضلعی انتظامیہ، میونسپل کارپوریشنوں و ضلع کونسلوں کی طرف سے نئے قبرستانوں کیلئے جگہ مختص نہیں کی جارہی۔

 

روزنامہ دنیا ایپ انسٹال کریں