نجی تعلیمی اداروں کے مسائل حل کیے جا ئینگے ،وزیر مملکت تعلیم
اسلام آباد (خصوصی رپورٹر) وزیر مملکت تعلیم و پیشہ ورانہ تربیت وجیہہ قمر نے کہا ہے کہ نجی تعلیمی ادارے ملک کے تعلیمی نظام کا اہم ستون ہیں اور۔۔
ان کے مسائل کو ترجیحی بنیادوں پر حل کیا جائے گا۔ انہوںنے کہا حکومت آؤٹ آف سکول بچوں کو تعلیمی دھارے میں لانے کیلئے کو شاں ہے ،یہ بات انہوں نے صدر پرائیویٹ ایجوکیشنل سوسائٹی اور امیدوار برائے ممبر بورڈ آف گورنرز، فیڈرل بورڈ، حافظ محمد بشارت سے ملاقات کے دوران کہی۔ حافظ محمد بشارت نے کہا کہ نجی تعلیمی ادارے لاکھوں بچوں کو معیاری تعلیم مہیا کر رہے ہیں، تاہم بڑھتی ہوئی مہنگائی، پالیسیوں میں تسلسل کی کمی اور ریگولیٹری اداروں کے سخت ضوابط ان کے لیے بڑے چیلنج بن چکے ہیں ، وجیہہ قمر نے کہا کہ وزارت تعلیم نجی تعلیمی شعبے کے کردار کو قدر کی نگاہ سے دیکھتی ہے اور اس کے مسائل کے حل کے لیے ایک مربوط اور موثر حکمت عملی مرتب کی جا رہی ہے ، آؤٹ آف سکول بچوں کو واپس تعلیمی دھارے میں لانے کے لیے نجی و سرکاری اداروں کا اشتراک ناگزیر ہے ۔ملاقات میں شریک پروفیسر رفیق طاہر نے پالیسی سازی میں نجی اداروں کی مشاورت کو مستقل بنیادوں پر شامل کرنے کی ضرورت پر زور دیا۔
