سول سیکرٹریٹ اجلاس، نئے بلدیاتی قانون کی تیاری پر غور
لاہور(اپنے سٹی رپورٹر سے)وزیراعلیٰ کی قائم کردہ خصوصی کمیٹی کا اجلاس سول سیکرٹریٹ میں وزیر بلدیات ذیشان رفیق کی زیرصدارت ہوا جس میں پنجاب کے نئے لوکل گورنمنٹ ایکٹ کی تیاری کے امور پر غور کیا گیا۔
کمیٹی کے ممبر ارکان پنجاب اسمبلی اور متعلقہ افسروں نے اجلاس میں شرکت کی۔ اجلاس کے دوران سیالکوٹ، اوکاڑہ اور رحیم یار خان کا بلدیاتی درجہ بڑھانے ، پانچ لاکھ سے زائد آبادی اور ڈویژنل ہیڈکوارٹرز میں میٹروپولیٹن کارپوریشن بنانے کی تجاویز پر غور کیا گیا۔ علاوہ ازیں یونین کونسل کی آبادی کے تعین اور ٹاؤن کمیٹیوں کے قیام پر مشاورت کی گئی۔ اجلاس سے خطاب کرتے ہوئے کمیٹی کے کنوینر اور وزیر بلدیات ذیشان رفیق نے کہا نئی قانون سازی میں سابق تجربات کو مدنظر رکھا جائے گا،ایسا نظام وضع کیا جائے گا جو صحیح معنوں میں ڈلیور کر سکے ۔ ذیشان رفیق نے کہا کمیٹی اپنی سفارشات صوبائی کابینہ کو بھجوائے گی۔انہوں نے کہا نئی قانون سازی سے قبل تمام پہلوؤں پر غور کیا اور منتخب نمائندوں کی تجاویز کو مدنظر جا رہا ہے۔
