حکومتی کاوشوں سے سرمایہ کاری کی راہیں کھل گئیں، شافع حسین
لاہور(خبر نگار)صوبائی وزیر صنعت و تجارت چودھری شافع حسین سے گلوبل ٹریڈ ایکسپو سینٹر پاکستان کے چیئرمین مظہر حسین نے ملاقات کی۔ پنجاب کے صنعتی مراکز میں سرمایہ کاری مواقع پر بات چیت ہوئی۔
چیئرمین ٹریڈ ایکسپو نے صوبائی وزیر کو ستمبر میں پیرس میں ہونے والے انویسٹمنٹ بزنس فورم میں شرکت کی دعوت دی۔ شافع حسین نے اس موقع پر کہا پنجاب کی بزنس کمیونٹی کا وفد انویسٹمنٹ بزنس فورم پیرس میں شرکت کرے گا۔ حکومتی کاوشوں سے پنجاب میں سرمایہ کاری کی نئی راہیں کھل گئی ہیں۔پنجاب کے صنعتی مراکز میں تیزی سے نئے کارخانے لگ رہے ہیں ،لوگوں کو روزگار مل رہا ہے ۔سپیشل اکنامک زونز میں سرمایہ کاروں کو 10سال تک انکم ٹیکس چھوٹ اور ایک مرتبہ ڈیوٹی فری مشینری درآمد کی سہولت حاصل ہے ۔ چین،جاپان ودیگر غیر ملکی سرمایہ کار کمپنیاں پنجاب میں ای وی سیکٹر اور دیگر شعبوں میں سرمایہ کاری کر رہی ہیں۔یورپ کے سرمایہ کار بھی سرمایہ کاری مواقع سے فائدہ اٹھا سکتے ہیں۔ گلوبل ٹریڈ ایکسپو سینٹر یورپ کے سرمایہ کاروں کو پنجاب میں سرمایہ کاری مواقع سے آگاہ کریں۔محکمہ صنعت و تجارت اور گلوبل ٹریڈ ایکسپو سینٹر پاکستان کے مابین سرمایہ کاری کے فروغ کیلئے جلد تعاون کا معاہدہ ہوگا۔ صوبائی وزیر نے بتایا قائد اعظم بزنس پارک شیخوپورہ میں گارمنٹ سٹی اور فارماسیوٹیکل ویلی بنا رہے ہیں۔سیالکوٹ میں 740 ایکڑ پر سرجیکل سٹی بھی بنے گا۔
