اوورسیز پاکستانی سرمایہ کاری مواقع سے فائدہ اٹھائیں، انوار کاکڑ
لندن (نیوز ایجنسیاں،دنیا نیوز)نگران وزیراعظم انوار الحق کاکڑ نے بیرون ملک مقیم پاکستانیوں پر زور دیا ہے کہ وہ پاکستان میں سرمایہ کاری کے مواقع سے فائدہ اٹھائیں۔
عالمی بینک، ایشیائی ترقیاتی بینک اور دوست ممالک کی جانب سے رقوم کی فراہمی،مثبت اشاریوں نے مہنگائی میں کمی، زرمبادلہ کے ذخائر کو مستحکم اور صنعتی ترقی کی بحالی میں اہم کردار ادا کیا ہے ، نگران حکومت کے انتظامی اقدامات نے پاکستانی روپے کو امریکی ڈالر کے مقابلہ میں مضبوط کیا۔ پیر کو وزیراعظم آفس کے میڈیا ونگ سے جاری پریس ریلیز کے مطابق نگراں وزیراعظم سے برطانوی و پاکستانی تاجروں کے وفد نے پاکستان ہاؤس لندن میں ملاقات کی۔ ملاقات کرنے والوں میں نمایاں سرمایہ کاری کرنے والی فرموں فیلڈیلٹی انٹرنیشنل لمیٹڈ ، ولنگٹن مینجمنٹ، اشمور، جیفریز انٹرنیشنل، ریڈ ویل کیپٹل، سویٹیکس انڈسٹریل ایس اے ، آکسفورڈ فرنٹیئر کیپٹل، گارنٹکو، جے پی مورگن، کالراک کیپٹل اور یو بی ایل (یوکے ) کے نمائندے شامل تھے ۔ وزیراعظم نے وفد کو پاکستان کے موجودہ معاشی منظرنامہ سے آگاہ کرتے ہوئے بیرونی کھاتوں کی بہتری کیلئے حکومتی اقدامات پر روشنی ڈالی۔ انہوں نے کہا درآمدات پر پابندیوں کے خاتمے ، زرعی مدد اور درمیانی مدت کے افراط زر کے اہداف کیلئے مالیاتی اقدامات کے بعد تجارت ، زراعت اور صنعت میں بہتری آئی ہے ۔
وزیراعظم نے خصوصی سرمایہ کاری سہولت کونسل کے حوالے سے وفد کو آگاہ کرتے ہوئے پاکستان کی سرمایہ کاری کی حامل کاوشوں پر روشنی ڈالی۔ انہوں نے کہا اس کونسل سے سرمایہ کاری کے عمل کیلئے راہیں ہموار ہو رہی ہیں۔ برطانوی سرمایہ کاروں نے پاکستان میں آئی ایم ایف پروگرام کے تسلسل اور قلیل و وسط مدتی اصلاحاتی کوششوں کے بارے میں معلومات لیں۔ نگران وزیراعظم سے بوہو گروپ کے شریک بانی عبداللہ کامانی نے بھی ملاقات کی جس میں اقتصادی تعاون اور تجارت بڑھانے پر بات چیت ہوئی۔عبداللہ کامانی نے پاکستان کے ساتھ طویل المدتی خریداری کے روابط قائم کرنے میں گہری دلچسپی کا اظہار اور کپاس سے ملبوسات کی پیداوار تک ایک جامع سپلائی چین بنانے کے عزم کا اظہار کیا۔
