پٹرول کی قیمت میں 74 روپے اور ہائی سپیڈ ڈیزل کی قیمت میں 67 روپے فی لٹر کمی کا اعلان خوش آئند ہے اور امریکہ ایران امن معاہدے کا ثمر ہے۔ ایسے وقت میں جب مہنگائی سے عام آدمی شدید مشکل میں ہے‘ پٹرولیم مصنوعات کی قیمتوں میں کمی عوام کے لیے بڑا ریلیف ثابت ہو گی۔ یہ امر اطمینان بخش ہے کہ تیل کی عالمی منڈی میں پیدا ہونے والی مثبت صورتحال کا ثمر عوام تک منتقل کیا جا گیا ہے لیکن اصل سوال یہ ہے کہ روزمرہ زندگی کی اشیا پر اس کے اثرات کس حد تک ہوں گے؟ ملک میں جب بھی پٹرول یا ڈیزل مہنگا ہوتا ہے تو ٹرانسپورٹ کے کرایے فوری بڑھا دیے جاتے ہیں لیکن جب ایندھن سستا ہو تو کرایوں میں کمی شاذونادر ہی دیکھنے میں آتی ہے۔ یہی صورتحال اشیائے خورونوش اور دیگر ضروریاتِ زندگی کی قیمتوں کے معاملے میں بھی ہے۔

حکومت کی ذمہ داری صرف پٹرولیم مصنوعات کی قیمتوں میں کمی تک محدود نہیں ‘ اس کو یہ بھی یقینی بنانا ہو گا کہ ٹرانسپورٹ کرایوں‘ اشیائے خورونوش اور روزمرہ استعمال کی دیگر اشیا کی قیمتوں میں بھی فوراً متناسب کمی آئے۔ اس مقصد کے لیے ناجائز منافع خوروں اور ذخیرہ اندوزوں کے خلاف فوری مؤثر کارروائی ناگزیر ہے۔ پٹرولیم مصنوعات کی قیمتوں میں کمی کے حقیقی فوائد اسی وقت حاصل ہوں گے جب حکومت اس ریلیف کو معیشت کے دیگر شعبوں تک منتقل کرنے کے لیے مؤثر‘ سخت اور مسلسل اقدامات کرے۔

روزنامہ دنیا ایپ انسٹال کریں