بیٹے کی کمی محسوس نہیں ہوئی، بیٹیاں میری دنیا :شہود علوی
لاہور(شوبزڈیسک )نامور اداکار شہود علوی نے بیٹوں اور بیٹیوں کے درمیان فرق پر کھل کر خیالات کا اظہار کر تے ہوئے کہاکہ مجھے کبھی بھی ایسا محسوس نہیں ہوا۔۔
کہ میرا بیٹا نہیں ہے ، میں نے کبھی بیٹے کی خواہش نہیں کی، کیونکہ میری بیٹیاں میری دنیا ہیں، بیٹے اور بیٹیاں دونوں ہی والدین سے محبت کرتے ہیں، مگر اظہار کا انداز مختلف ہوتا ہے ، بیٹیاں اپنی محبت کا اظہار زیادہ کرتی ہیں، جبکہ بیٹے کچھ فاصلہ رکھتے ہیں، بیٹے گھر کی ذمے داریوں میں مصروف ہو جاتے ہیں، جس کی وجہ سے وہ والدین سے کچھ دور ہو جاتے ہیں، جبکہ بیٹیاں زیادہ قریب رہتی ہیں۔پوڈکاسٹ کے دوران شہود علوی نے اداکاروں کو تنقید کا سامنا کرنے سے متعلق مفید مشورے بھی دیتے ہوئے کہا کہ ہر شخص اتنا ذہین نہیں ہوتا کہ وہ آپ کے کردار یا آپ کی زندگی کے حالات کو سمجھ سکے۔
، اس لیے اگر آپ اداکار ہیں، تو آپ کو ٹرولنگ (تنقید) کے لیے تیار رہنا چاہیے ۔ صبر اور تحمل سے لوگوں کو اپنے نقطۂ نظر سے آگاہ کریں، ہر کسی سے یہ امید نہ رکھیں کہ وہ آپ کے کام کو فوراً سمجھ لے گا، منفی تنقید کا مثبت جواب دینا ایک فن ہے ۔
