نہیں چاہتی کہ میری بیٹیاں شوبز میں کام کریں: آمنہ ملک
لاہور(شوبزڈیسک) اداکارہ، میزبان و ماڈل آمنہ ملک نے شوبز انڈسٹری میں کی جانے والی بدسلوکیوں کا ذکر کرتے ہوئے کہا ہے کہ وہ اپنی بیٹیوں کو شوبز انڈسٹری کا حصہ نہیں بنانا چاہتیں۔
ایک پوڈ کاسٹ انٹرویو میں انہوں نے کہاکہ میں نے ساری زندگی انڈسٹری میں گزاری ہے اور ابھی بھی اس انڈسٹری کا حصہ ہوں مگر میں نہیں چاہوں گی کہ میری بیٹیاں اس شعبے سے وابستہ ہوں۔ ہمارے ہاں راتوں رات اداکار نہیں بنا جاتا، اداکار بننے کے لیے جدوجہد کرنی پڑتی ہے اور جدوجہد کے اس سفر میں بہت سی اور چیزیں بھی شامل ہوتی ہیں، ڈراموں میں مرکزی کردار ادا کرنے والی اداکارائیں دیگر اداکاراؤں اور سٹاف کے ساتھ بہت برا رویہ اختیار کرتی ہیں، جس طرح سے بات کی جاتی ہے میں کبھی نہیں چاہوں گی کہ میری بیٹی سے کوئی اس طرح سے بات کرے یا اُسے بری نظر سے دیکھا جائے ۔ انڈسٹری میں بہت سے ایسے لوگ بھی موجود ہیں جو کہتے ہیں ہم کراچی آ رہے ہیں، آپ آج کیا کر رہی ہیں، کیا آپ کافی پینے چلیں گی؟ میں ایسی پیشکش پر انکار کر دیتی ہوں۔
