لیونارڈو ڈی کیپریو کی اسرائیل میں سرمایہ کاری ،صارفین کی تنقید
لاس اینجلس (شوبز ڈیسک)امریکی اداکار و فلم پروڈیوسر لیونارڈو ڈی کیپریو ایک بار پھر تنازعے کا شکار ہو گئے ۔۔
غیر ملکی میڈیا ر پورٹس کے مطابق اسرائیلی میڈیا نے انکشاف کیا کہ لیونارڈو ڈی کیپریو اسرائیل کے شہر ہرزلیہ میں ایک پُرتعیش ‘ایکو ہوٹل’ کی تعمیر میں سرمایہ کاری کر رہے ہیں۔میڈیا رپورٹس کے مطابق لیونارڈو ڈی کیپریو نے اسرائیل میں جس منصوبے میں سرمایہ کاری کی ہے اسے حال ہی میں تل ابیب ڈسٹرکٹ پلاننگ اینڈ بلڈنگ کمیٹی کی جانب سے منظوری دی گئی ہے ۔ لیونارڈو ڈی کیپریو کی اسرائیل میں سرمایہ کاری کو دنیا بھر میں موجود ان کے مداح و سوشل میڈیا صارفین اداکار کی بے حسی اور غیر ذمہ دارانہ فیصلہ قرار دے رہے ہیں۔کچھ نیٹیزنز کا کہنا ہے کہ لیونارڈو کی یہ سرمایہ کاری ‘نسل کشی میں بالواسطہ شراکت’ ہے ۔دوسری جانب امریکی سماجی کارکن اور لکھاری شان کنگ نے ایکس پر لکھا ہے کہ جب غزہ بھوک سے مر رہا ہے ، لیونارڈو ڈی کیپریو اسرائیل میں ایک 14 منزلہ ہوٹل بنا رہا ہے ۔انہوں نے اداکار پر نسل کشی کے دوران نسلی امتیاز سے منافع کمانے کا الزام بھی عائد کیا ہے جو سوشل میڈیا پر ہزاروں افراد کی آواز بن گیا ہے ۔
