گھر میں قرنطینہ : مریض کو 15میں سے 12نمبر لینے ہو نگے

گھر میں قرنطینہ : مریض کو  15میں سے 12نمبر لینے ہو نگے

پنجاب حکومت نے کورونا کے مریض کو گھر میں قرنطینہ کی اجازت دے دی, جس میں مریض کیلئے 15میں سے 12نمبر حاصل کرناضروری ہوگا

لاہور(سید سجاد کاظمی ) محکمہ پرائمری اینڈ سیکنڈری ہیلتھ کیئر کے نوٹیفکیشن کے مطابق علیحدہ کمرے کے 5 نمبر، علیحدہ واش روم کے تین نمبر ہونگے ۔گھر کی لوکیشن اور فون کی دستیابی کا ایک ایک نمبر الگ سے ہو گا، اسی طرح ہائپر ٹینشن کے 2، تیماردار، ٹرانسپورٹ اور خاندان کی تعلیم کا ایک ایک نمبر مریض کو دیا جائے گا۔ہسپتالوں میں داخل کورونا کی مثبت علامات نہ ہونیوالے مریض آج سے کمیٹی کو گھر میں قرنطینہ کیلئے درخواست دے سکیں گے جس کیلئے ہسپتال انتظامیہ کی جانب سے وارڈز میں اعلانات کئے جائیں گے ۔مریض کا گھر ہائی ڈیپی ڈینسی یونٹ( ایچ ڈی یو) کی سہولت ایک گھنٹے سے زیادہ کی مسافت پر نہیں ہونی چاہیے ۔گھر میں مریض کیلئے علیحدہ کمرے اور علیحدہ واش روم کی سہولت ہونی چاہئے ۔مریض کے پاس چوبیس گھنٹے فون کی سہولت دستیاب ہونی چاہئے ۔ نوٹیفکیشن کے مطابق مریض کے بلڈ پریشر کی صورتحال نارمل ہونی چاہئے ،مریض کی نگرانی کیلئے گھر میں صحت مند شخص کاموجود ہونا ضروری ہو گا۔طبیعت کی خرابی پر مریض کے پاس ٹرانسپورٹ کی سہولت موجود ہونی چا ہئے ۔مریض کے خاندان میں کورونا وائرس سے متعلق آگاہی اور حکومتی ہدایات سمجھنے کی صلاحیت ہونی چاہئے ۔ میڈیکل ماہرین کا کہنا ہے کہ اتنے سخت ایس او پیز کے مطابق غریب مریض گھر میں آئسولیٹ نہیں ہوسکے گا اور ضروری بھی ہے کہ اگر گھر میں الگ سے واش روم، تیماردار اور کمرے کی سہولت نہیں تو مریض ہسپتال میں زیر علاج رہے جس کا فیصلہ کمیٹی کرے گی۔

روزنامہ دنیا ایپ انسٹال کریں