لکی مروت:گاڑی پر بم حملہ،کیپٹن سمیت 7فوجی جوان شہید
راولپنڈی(خصوصی نیوز رپورٹرنامہ نگار) خیبرپختونخوا کے ضلع لکی مروت میں سکیورٹی فورسز کی گاڑی پر حملے میں کیپٹن سمیت 7 جوان شہید ہوگئے ۔
پاک فوج کے شعبہ تعلقات عامہ کے مطابق سکیورٹی فورسز کی گاڑی پر دیسی ساختہ بم سے حملہ کیا گیا، حملے میں کیپٹن محمد فراز الیاس، صوبیدار میجر محمد نذیر ، لانس نائیک محمد انور، لانس نائیک حسین علی ،سپاہی اسد اللہ، سپاہی منظور حسین اور سپاہی راشد محمود وطن پر قربان ہوگئے ۔آئی ایس پی آر کے مطابق 26سالہ کیپٹن محمد فراز الیاس شہید کا تعلق ضلع قصور سے ہے ،انہو ں نے 2020 میں پاکستان آرمی کی ناردرن لائٹ انفنٹری میں کمیشن حاصل کیا ،کیپٹن محمد فراز الیاس شہید نے 19 جون 2024 کو رشتہ ازدواج میں منسلک ہونا تھا ،کیپٹن محمد فراز الیاس شہید نے سوگواران میں والدین اور بہن بھائی چھوڑے ہیں۔50سالہ صوبیدار میجر محمد نذیر شہید کا تعلق ضلع سکردو سے ہے ،انہوں نے 31 سال تک دفاع وطن کے فرائض سرانجام دیئے ، صوبیدار میجر محمد نذیر شہید نے سوگواران میں اہلیہ 2 بیٹے اور 5 بیٹیاں چھوڑے ہیں۔36سالہ لانس نائیک حسین علی خان شہید کا تعلق ضلع غذر سے ہے ، پاکستان آرمی میں 14 سال تک خدمات سرانجام دینے والے لانس نائیک حسین علی شہید نے سوگواران میں والدین اور بہن بھائی چھوڑے ہیں۔34سالہ لانس نائیک محمد انور شہید کا تعلق ضلع گانچھے سے ہے ، پاکستان آرمی میں 13 سال تک دفاع وطن کے فرائض سرانجام دیے ، سوگواران میں اہلیہ، دو بیٹیاں اور دو بیٹے چھوڑے ہیں ۔27
سالہ سپاہی منظورحسین شہید کا تعلق ضلع گلگت سے ہے ،6سال تک پاک آرمی میں خدمات انجا م د یں ، سوگواران میں اہلیہ اور3 بیٹیاں چھوڑیں ہیں ۔ملتان کے 33سالہ سپاہی اسد اللہ شہید نے پاکستان آرمی میں 14 سال تک فرائض نبھائے ، سوگواران میں اہلیہ اور ایک بیٹا ، چھوڑے ہیں۔راولپنڈی کے 31سالہ سپاہی راشد محمود شہید نے پاکستان آرمی میں 13 سال تک دفاع وطن میں خدمات سرانجام دیں،انہوں نے سوگواران میں والدین اور بہن بھائی چھوڑے ہیں۔آئی ایس پی آر کا کہناتھاکہ لکی مروت کے علاقے میں موجود دہشتگردوں کو ختم کرنے کے لئے سینی ٹائزیشن آپریشن جاری ہے ، بہادر سپاہیوں کی ایسی قربانیاں ہمارے عزم کو مزید مضبوط کرتی ہیں ، گھناؤنے فعل کے مرتکب افراد کو کیفر کردار تک پہنچایا جائے گا،پاکستان کی مسلح افواج دہشت گردی کی لعنت ختم کرنے کیلئے پرعزم ہیں ۔صدر مملکت آصف علی زرداری نے پاک فوج کے جوانوں کی شہادت پر اظہار افسوس کرتے ہوئے کہاکہ پوری قوم ملک سے دہشت گردی کے ناسور کے مکمل خاتمے کیلئے پرعزم ہے ۔ وزیر اعظم شہباز شریف نے کہا ہے کہ دہشت گردوں کو کیفر کردار تک پہنچا کر دم لیں گے ۔ پوری قوم قانون نافذ کرنے والے اداروں کو ان کی خدمات پر سلام پیش کرتی ہے ، دہشتگردی کے خلاف جنگ میں پوری قوم نڈر جوانوں کے ساتھ کھڑی ہے ۔ وفاقی وزیرداخلہ محسن نقوی نے کہا کہ شہداء نے اپنا قیمتی لہو دے کر امن کی آبیاری کی ہے ۔ شہداء قوم کا افتخار ہیں اور ان کی لازوال قربانیوں کو سلام پیش کرتے ہیں۔
