اسمبلی میں بیٹھے متعدد لوگ عوامی نمائندے نہیں :شاہد خاقان
اسلام آباد (دنیا نیوز)سابق وزیراعظم شاہد خاقان عباسی نے کہا کہ ہم پارلیمانی نظام اور جمہوریت قبول نہیں کر پائے ، قصور اداروں یا آئین کا نہیں افراد کا ہے ۔
سابق وزیر اعظم شاہد خاقان عباسی نے ‘‘پائیدار جمہوریت’’ کے عنوان سے سیمینار سے خطاب کرتے ہوئے کہا کہ بد قسمتی سے پارلیمان کو چلنے نہیں دیا جاتا، اسمبلی میں بیٹھے بڑی تعداد میں لوگ عوامی نمائندے نہیں لائے جاتے ہیں، قانون سازی بغیر بحث کے بلڈوز کرکے کی جاتی ہے ، بیرونی دورے محض سیر سپاٹے تک محدود رہتے ہیں۔ پارلیمنٹرینز سے بات کرنے تک کا حق بھی چھین لیا گیا ہے ، وزارت بیورو کریٹ چلاتا ہے ، ذمہ داری وزیر پر آتی ہے ، جمہوریت چلانے کیلئے یہ مسائل حل کرنے پڑیں گے ، ایک وقت تھا، اسمبلی میں سوچ سمجھ کر بات کی جاتی تھی، نیب کی 4 ترامیم سے کوئی فرق نہیں پڑا، اب پانچویں آرہی ہے ، اسمبلی میں قانون منٹ اور سیکنڈ میں پاس کر دیئے جاتے ہیں۔ صوبوں کو اقتدار میں حصہ پارلیمانی جمہوریت کے ذریعے ہی دیا جاتا ہے ، قانون سازی بغیر بحث کے بلڈوز کرکے کی جاتی ہے ، وفاقی حکومت اب صرف 3 وزارتوں پر منحصر رہ گئی ہے ۔
