مذہبی امور سمیت 4قائمہ کمیٹیوں کے چیئرمینوں کا انتخاب مکمل
اسلام آباد(سٹاف رپورٹر،اپنے رپورٹر سے) قومی اسمبلی کی 4 قائمہ کمیٹیوں کے چیئرمینوں کا ا نتخاب کر لیا گیا۔ قائمہ کمیٹی برائے مذہبی امور کے اجلاس میں ملک عامر ڈوگر کو کمیٹی کا متفقہ طور پر چیئرمین منتخب کیا گیا۔
ممبر کمیٹی چودھری ارمغان سبحانی نے ملک عامر ڈوگر کا نام مذہبی امور کمیٹی کے چیئرمین کے طور پر تجویز کیا جبکہ شگفتہ جمانی اور فضل محمد خان سمیت دیگر ممبران نے انکے نام کی تائید کی۔ قومی اسمبلی کی قائمہ کمیٹی برائے انسانی حقوق کے اجلاس میں صاحبزادہ حامد رضا کو متفقہ طور پر چیئرمین منتخب کیا گیا۔ نوشین افتخار نے حامد رضا نام تجویز کیا جبکہ زرتاج گل، نوید عامر جیوا سمیت دیگر ممبران نے انکے نام کی تائید کی۔ قومی اسمبلی کی قائمہ کمیٹی برائے کشمیر افیئرز کا چیئرمین حاجی امتیاز احمد چودھری کو متفقہ طور پر منتخب کیا گیا۔ قائمہ کمیٹی ب سمندر پار پاکستانی اور افرادی قوت کے اجلاس میں جنید اکبر کو متفقہ طور پر چیئرمین منتخب کیا گیا۔ علاوہ ازیں عقیل ملک ایم این اے کو متفقہ طور پر صنفی مین سٹریمنگ کی خصوصی کمیٹی کا چیئرمین منتخب کر لیا گیا۔
