لاہور :پہلی الیکٹرک بس سروس،مریم نواز نے افتتاح کردیا
لاہور(دنیا نیوز،خبر ایجنسیاں) وزیر اعلیٰ پنجاب مریم نواز شریف نے پاکستان کی پہلی مکمل ای وی بس سروس کا باقاعدہ افتتاح کر دیا۔ وزیراعلیٰ نے الیکٹرک بس میں سواری کی اور تفصیلی معائنہ بھی کیا۔
لاہور میں الیکٹرک وہیکل بس سروس پائلٹ پراجیکٹ کے بارے میں صوبائی وزیر ٹرانسپورٹ بلال اکبر نے تفصیلی بریفنگ دی۔بریفنگ میں بتایاگیا الیکٹرک بس میں جی پی ایس لوکیشن ریکارڈر،وائی فائی، یو ایس بی (USB)پورٹ اور دیگر سہولیات موجود ہیں۔ الیکٹرک بس میں 30نشستیں،80مسافروں کی گنجائش ہو گی، سپیشل افراد کے لئے ریمپ اور نشستیں مخصوص ہو نگی۔ پہلی بار الیکٹرک بس میں مسافروں کے تحفظ کے لئے فرش پر اینٹی سلپ شیٹ کا استعمال کیا گیا ہے ۔پاکستان کی مکمل الیکٹرک بس کے لئے گرین ٹاؤن ہمدرد چوک ڈپو میں 9 مخصوص چارجنگ سٹیشن قائم کیے گئے ہیں ،ہرچارجنگ کے بعد بس 250 کلومیٹر فاصلہ طے کر سکے گی اورچار مرتبہ روٹ مکمل کرسکے گی۔ بس میں مسافروں کی سہولت کے لئے روٹ ڈسپلے بھی نظر آئے گا۔ خواتین کے لئے الگ سیکشن ہو گااور ہراسانی کے واقعات کے سد باب کے لئے کیمرے بھی نصب ہوں گے ۔بریفنگ میں بتایاگیا لاہورکے سب سے طویل ترین 21کلو میٹر روٹ پر 27الیکٹرک بسیں چلائی جائیں گی۔
ریلوے سٹیشن تا گرین ٹاؤن براستہ کوئینز روڈ، مزنگ، فیروز پور روڈ،کیمپس پل اور اچھر ہ نہرسے ای بس سروس شروع ہوگی۔ لاہور کی پہلی ای بس سروس پر 17ہزار مسافر روزانہ سفر کر سکیں گے ۔ ریلوے سٹیشن تا گرین ٹاؤن روٹ پر ای وی بس سروس کا باقاعدہ آغاز فروری کے وسط میں ہوگا۔ روٹ پر42 جدید ترین بس شیلٹر قائم ہونگے اورہر9منٹ کے بعد بس آئے گی۔ بس کے لئے مخصوص ایپ بھی متعارف کرائی جائے گی ،بس کی ٹریکنگ ممکن ہو گی۔ کرایہ ڈیجیٹل والٹ،ڈیجیٹل کارڈ کے ذریعے ادا کیا جا سکے گا۔ یونیورسل ٹرانسپورٹ کارڈ بھی ایشو کئے جائیں گے ۔ 70 ڈرائیور زکی سپیشل ٹریننگ کا آغاز ہو گیا ہے ۔دریں اثناء وزیراعلیٰ مریم نواز کی زیر صدارت اجلاس میں ای ٹیکسی پراجیکٹ کابھی جائزہ لیا گیا۔وزیراعلیٰ نے بس سٹینڈ پر سولر فین اور واٹر کولر کی تنصیب کا جائزہ لینے کی ہدایت کی اورہر بس سٹینڈ پرسیف سٹی کیمرے نصب کرنے کا حکم دیا۔ وزیراعلیٰ نے ای ٹیکسی کی پنجاب میں اسمبلنگ کا جائزہ لینے اور نجی اشتراک سے الیکٹرک چارجنگ سٹیشن قائم کرنے کے اقدامات کی ہدایت کی۔
