عمران خان کے خلاف توشہ خانہ ٹو کیس کی سماعت منسوخ
اسلام آباد(کورٹ رپورٹر،مانیٹرنگ ڈیسک)بانی پی ٹی آئی عمران خان کیخلاف توشہ خانہ ٹو کیس میں اڈیالہ جیل میں آج ہونے والی سماعت منسوخ کر دی گئی،بانی پی ٹی آئی کے وکیل خالد یوسف کو عدالتی عملہ نے آگاہ کر دیا۔
خالد یوسف نے بتایا کہ اگلی تاریخ سماعت آج جوڈیشل کمپلیکس میں بتائی جائے گی۔ دریں اثنا سپریم کورٹ میں 9 اور 10 مئی کے رواں اور آئندہ ہفتے مقرر تمام مقدمات ڈی لسٹ کر دئیے گئے ۔چیف جسٹس یحیی آفریدی کی سربراہی میں 3 رکنی بینچ نے سماعت کی ۔سینئر وکیل ذوالفقارنقوی نے کہا پنجاب حکومت نے مجھے 9 مئی مقدمات میں وکیل مقرر کیا ہے ، عدالت سے استدعا ہے کہ تیاری کیلئے وقت دیا جائے ،چیف جسٹس یحیی آفریدی نے کہا نو مئی کے مقدمات تو کل اور پرسوں بھی مقرر ہیں، گزشتہ سماعتوں پر ایڈیشنل پراسیکیوٹر پیش ہو کر وقت مانگتے رہے ، آج آپ وقت مانگ رہے ہیں، ایسے نہیں چلے گا، یہ کوئی ایک کیس نہیں، 50 کے قریب اپیلیں ہیں۔وکیل ذوالفقار نقوی نے کہا رواں ہفتے کے مقدمات ملتوی کر دیں، آئندہ ہفتے والوں کی تیاری کر کے آؤں گا،چیف جسٹس نے کہا کچھ اپیلیں کیس منتقلی کے حوالے سے بھی ہیں، کیس منتقلی کا معاملہ ختم ہو چکا اس پر حکومت سے ہدایات لے لیں جس پر ذوالفقار نقوی نے کہا کہ جج کا تبادلہ ہو چکا صرف جرمانے اور کچھ آبزرویشنز کی حد تک اپیل کی پیروی کریں گے ،بعدازاں سپریم کورٹ میں 9 اور 10 مئی کے رواں اور آئندہ ہفتے مقرر تمام مقدمات ڈی لسٹ کر دئیے گئے ، عدالت نے پنجاب حکومت کی مہلت کی استدعا منظور کر لی اور کہا کہ تمام مقدمات کی سماعت عید کے بعد ہوگی۔یاد رہے کہ لاہور ہائیکورٹ نے 9 مئی کے ملزمان کی ضمانتیں منظور کی تھیں، پنجاب حکومت نے ضمانتیں منسوخ کرنے کیلئے سپریم کورٹ سے رجوع کر رکھا ہے ۔
