پختونخوا :عوام نے سکیورٹی اہلکار کے اغوا کی کوشش ناکام بنادی
اسلام آباد(خصوصی نیوز رپورٹر)خیبرپختونخوا کے عوام سکیورٹی اہلکار کے اغوا کی کوشش ناکام بنا دی ،سکیورٹی ذرائع کے مطابق ضلع خیبر کی وادی تیراہ میں چھٹی پر آئے سکیورٹی اہلکار کے گھر کا محاصرہ کرنے والے مسلح افراد کے خلاف مقامی افراد متحد ہوگئے۔
سکیورٹی ذرائع کے مطابق تیراہ کے رہائشیوں نے واضح کیا کہ ہمارا دہشت گردوں سے کوئی لینا دینا نہیں، ہمیں امن سے جینے دیں، ہم فوجی کو حوالے نہیں کریں گے ،اس سے قبل کرک میں بھی عوام نے سکیورٹی فورسز کے ساتھ ملکر خوارج کے حملے کو پسپا کیا تھا ۔ اہل علاقہ کا کہنا تھا کہ فتنے کا دور ہے اور ہم اس فتنے کو ختم کر کے دم لیں گے ، عوام کو چا ہئے کہ اس فتنے کیخلاف اٹھ کھڑے ہوں۔سکیورٹی ذرائع کے مطابق لکی مروت میں نماز عشا کے وقت عباسہ خٹک میں قائم مسجد کے باہر سکیورٹی پر مامور مقامی رہائشی کا خوارج سے سامنا ہوا، مسجد میں موجود تمام نمازیوں نے ملکر خوارج کو مار بھگایا، مقامی افراد اور خوارج کے درمیان فائرنگ کا تبادلہ بھی ہوا ۔ دفاعی ماہرین کا کہنا ہے کہ خیبر پختونخوا کے غیور عوام کی جانب سے خوارج کیخلاف اتحاد فتنہ الخوارج کی بڑی ناکامی ہے ۔ماہرین نے کہا کہ غیور عوام کی عسکریت پسندی کے خلاف عملی مزاحمت واضح پیغام ہے کہ وہ کسی صورت دہشت گردی کو برداشت نہیں کریں گے ۔
