ملکی معیشت میں بیرون ملک مقیم پاکستانیوں کا نمایاں کردار:فیلڈمارشل عاصم منیر
راولپنڈی (خصوصی نیوز رپورٹر)فیلڈ مارشل سید عاصم منیرنے بیرون ملک مقیم پاکستانیوں کی جانب سے پاکستان کے سفیر ہونے کے ناطے انکے اہم کردار کو سراہتے ہوئے ترسیلات زر، سرمایہ کاری اور دیگر شعبوں میں اعلیٰ کامیابیوں کے ذریعے فعال کردار ادا کرکے ملکی معیشت اور عالمی ساکھ میں انکی شراکت کا اعتراف کیا ہے ۔
فیلڈ مارشل عاصم منیر جوامریکا کے سرکاری دورے پر ہیں، نے واشنگٹن ڈی سی میں اوورسیز پاکستانی کمیونٹی سے بات چیت کی۔ ملاقات کیلئے بڑی تعداد میں جمع ہونے والے سمندر پار پاکستانیوں نے فیلڈ مارشل کا پرتپاک استقبال کیا ۔آئی ایس پی آر کے مطابق تارکین وطن نے آپریشن بنیان مرصوص/معرکہ حق کے دوران مسلح افواج کی شاندار کارکردگی کو سراہا جس میں انہوں نے بہادری اور پیشہ ورانہ مہارت کا مظاہرہ کیا۔فیلڈ مارشل عاصم منیر نے بیرون ملک مقیم پاکستانیوں کی جانب سے پاکستان ترسیلات زر، سرمایہ کاری اور دیگر شعبوں میں اعلیٰ کامیابیوں کے ذریعے فعال کردار ادا کرکے ملکی معیشت اور عالمی ساکھ میں انکی شراکت کو سراہا ۔سمندر پار پاکستانیوں نے فیلڈ مارشل سے اپنے تجربات اور تجاویز شیئر کیں۔فیلڈ مارشل عاصم منیر نے مشترکہ چیلنجز سے نمٹنے اور تعاون کو فروغ دینے کیلئے مسلسل تعاون کی ضرورت کو اجاگر کرتے ہوئے سمندر پار پاکستانیوں کے ساتھ روابط کی اہمیت پر زور دیا۔فیلڈ مارشل اور سمندر پار پاکستانیوں نے زیادہ محفوظ اور خوشحال پاکستان کیلئے ملکر کام کرنے کا عزم کیا۔
