پاکستان ہمیشہ مظلوموں کی آواز بنا،دعا ہے دنیا میں امن قائم ہو:مریم نواز
لاہور(اپنے نامہ نگارسے )وزیراعلیٰ مریم نواز شریف نے کہاہے کہ پاکستان ہمیشہ مظلوموں کی آواز بنا ہے ،مہاجرین کی فلاح کیلئے آواز بلند کرتے رہیں گے ، دعا ہے کہ دنیا میں امن قائم ہو، ظلم کا خاتمہ ہو اور ہر انسان کو سکون نصیب ہو۔
پناہ گزین افراد کے عالمی دن ورلڈ رفیوجی ڈے پر اپنے پیغام میں کہا ہے کہ مہاجر ہونا کوئی جرم نہیں ،اپنی مٹی چھو ڑنا بہت کرب ناک مجبوری ہے ، کوئی شوق سے پناہ گزین نہیں بنتا زندگی بچانے کے لئے اپنا آنگن، اپنی مٹی، اپنی چھت چھوڑنا پڑتی ہے ۔وزیراعلیٰ نے کہا کہ جنگیں ختم ہو جاتی ہیں مگر مہاجرین کی بے گھری نسلوں تک رہ جاتی ہے ،فلسطین ا ور شام کے دربدر مہاجرین انسانیت کیلئے ایک کڑے امتحان کے مترادف ہے ۔مریم نوازکاکہناتھاکہ دنیا کو ادراک ہونا چا ہئے کہ پناہ مانگنے والا کمزور نہیں، مظلوم ہوتا ہے ،پاکستان نے محدود وسائل کے باوجود فراغ دلی سے لاکھوں مہاجرین کی با عزت طریقے سے میزبانی کی۔
