بجٹ عوامی امنگوں کا ترجمان ،اتحادیوں کا شکریہ:وزیراعظم
اسلام آباد(نامہ نگار، مانیٹرنگ ڈیسک) وزیراعظم شہباز شریف نے بجٹ کی منظوری کے بعد ارکان پارلیمنٹ سے ملاقات میں معیشت، قومی سلامتی، سفارتی کامیابیوں اور علاقائی صورتحال پر تبادلہ خیال کیا۔بجٹ کی منظوری پر وزیراعظم نے معاشی ٹیم اور اتحادی جماعتوں کے ارکان پارلیمنٹ اور کابینہ اراکین کے اعزاز میں ناشتہ دیا۔
چیئرمین سینیٹ یوسف رضا گیلانی، وفاقی وزرا احسن اقبال،طارق فضل،علیم خان،خالد مقبول،رانا ثنا، اتحادی رہنمائوں پرویز اشرف،نوید قمر،خالد مگسی،سینیٹ اور قومی اسمبلی کے ارکان کی بڑی تعداد نے شرکت کی۔ ملاقات کے دوران ارکان اسمبلی سے وزیراعظم نے گفتگو کرتے ہوئے کہا عوام دوست بجٹ بنانے کیلئے معاشی ٹیم نے شب و روز محنت کی۔تمام اتحادی جماعتوں کے مشکور ہیں جن کی مشاورت سے عوامی امنگوں کی ترجمانی کرنے والا بجٹ تشکیل دیا۔ اتحادی جماعتوں نے بجٹ کی منظوری میں اہم کردار ادا کیا۔انہوں نے کہا اب ہم سب کو مل کر پاکستان کی معاشی ترقی کیلئے دن رات محنت کرنی ہے ۔میرا یقین محکم ہے یہی مثالی اتحاد پاکستان کی معاشی ترقی کو یقینی بنائے گا۔انہوں نے کہا پاکستان پر بھارت کی حالیہ بلاجواز جارحیت میں اللہ رب العزت نے ہمیں شاندار فتح سے ہمکنار کیا، افواج پاکستان، پوری سیاسی قیادت، عوام، سول سوسائٹی اور میڈیا نے یکجہتی سے دشمن کے ناپاک عزائم کو خاک میں ملایا، اقوام عالم میں پاکستان کا وقار بلند ہوا۔ انہوں نے کہا چیئرمین پیپلز پارٹی بلاول بھٹو زرداری کی قیادت میں سفارتی وفد نے پاکستان کا موقف واضح کیا اور بھارت کے پاکستان کے حوالے سے ناپاک عزائم کو دنیا کے سامنے بے نقاب کیا۔
نہ صرف سفارتی وفد کو بین الاقوامی سطح پر پذیرائی ملی بلکہ سمندر پار مقیم پاکستانیوں نے وفد کا شاندار استقبال کیا اور پاکستان کی سفارتی اور فوجی فتح پر حکومت اور افواج پاکستان کو بھر پور خراج تحسین پیش کیا۔انہوں نے کہا ایران پر حالیہ اسرائیلی جارحیت کے دوران پاکستان نے ایرانی حکومت و برادر عوام کے ساتھ ہر سطح پر یکجہتی کا اظہار کیا۔جنگ کے دوران ایرانی قیادت بالخصوص صدر ڈاکٹر مسعود پزشکیان کے ساتھ مکمل رابطے میں تھا۔اسرائیل ایران تناز ع کے حل سے خطے میں امن و خوشحالی کے دروازے کھلیں گے ۔ شہباز شریف سے مسلم لیگ ن کے ارکان قومی اسمبلی کھیل داس کوہستانی، ڈاکٹر درشن، نیلسن عظیم اور پیپلز پارٹی کے ارکان رمیش لال اور نوید عامر نے بھی ملاقات کی ۔ملاقات میں متعلقہ حلقوں کے امور پر گفتگو کی گئی ،ارکان نے وزیراعظم کو بجٹ منظوری پر مبارکباد پیش کی ۔دریں اثناء وزیر اعظم شہباز شریف نے مخصوص نشستوں کے حوالے سپریم کورٹ کے آئینی بینچ کے فیصلے کا خیرمقدم کیا ہے ۔وزیر اعظم نے قانونی ٹیم کو مبارکباددی اور انکی انتھک محنت پر پذیرائی کی۔ شہباز شریف نے کہا فیصلے سے آئین و قانون کی بالادستی قائم اور قانون کی درست تشریح ہوئی، اپوزیشن کو چاہیے کہ وہ حکومت کے ساتھ مل کر ملکی ترقی و خوشحالی کیلئے اپنا مثبت کردار ادا کرے ۔
