دیہی علاقوں کی ترقی اولین ترجیح رہے گی:شہبازشریف
لاہور(نیوزایجنسیاں)وزیر اعظم محمد شہباز شریف نے کہا ہے کہ ہماری حکومت دیہی ترقی کو قومی ترقی کے کلیدی ستون کے طور پر ترجیح دے رہی ہے ،
ہم اس عزم کا اعادہ کرتے ہیں کہ ایک مضبوط، زیادہ مساوی اور خوشحال پاکستان کی تشکیل میں برابر کے شراکت داروں کے طور پر دیہی علاقوں کی ترقی و خوشحالی ہماری اولین ترجیح رہے گی۔انہوں نے دیہی آبادی کی ترقی کے عالمی دن کے موقع پر اپنے پیغام میں کہاکہ پائیدار ترقی کے اہداف کے مطابق ہم زراعت، تعلیم، صحت کی دیکھ بھال، انفراسٹرکچر، ہنر کی تربیت اور ماحولیاتی پائیداری کے اہداف، سرمایہ کاری کے ذریعے دیہی معاش کو تبدیل کرنے پر توجہ مرکوز کر رہے ہیں،دیہی سڑکوں کے نیٹ ورک کو وسعت دینے اور پانی اور صفائی کی رسائی کو بہتر بنانے ، خواتین کو بااختیار بنانے اور موسمیاتی اسمارٹ فارمنگ کے طریقوں کو فروغ دینے سے اہم پیشرفت ہوئی ہے ۔ ہم ملکی ترقی میں اپنی دیہی آبادی کی شراکت کو تسلیم کرتے ہیں اور دیہی علاقوں کی فلاح و بہبود کیلئے اپنے عزم کا اعادہ کرتے ہیں۔ ہم اپنے دیہی علاقوں کے رہائشیوں کی ترقی کیلئے اپنے عہد کی تجدید کرتے ہیں۔
