مخصوص نشستوں پر بحال ارکان اسمبلی کو معطلی عرصہ کی بھی تنخواہ ملے گی
اسلام آباد(یاسرملک)مخصوص نشستوں پر بحال ہونے والے قومی اور صوبائی اسمبلیوں کے اراکین کیلئے دو ہری خوشخبری، معطلی کے عرصے کی تنخواہیں بھی ملیں گی۔۔۔
پارلیمانی ذرائع کے مطابق مخصوص نشستوں پر بحال ہونے والے قومی اور صوبائی اسمبلیوں کے اراکین کو معطلی کے عرصے کی تنخواہیں ادا کرنے کا فیصلہ کیا گیا ہے، قومی اور صوبائی اسمبلی کو سپریم کورٹ میں مخصوص نشستوں کا فیصلہ تحریک انصاف کے حق میں آنے کے بعد 13 مئی 2024 میں معطل کیا گیا تھا اورمعطلی کا نوٹیفکیشن جاری ہوتے ہی ان ارکان اسمبلی کی تنخواہیں روک لی گئی تھیں۔ عدالتی فیصلے کے بعد قومی اسمبلی کے مجموعی طور پر 22 اراکین معطل ہوئے تھے۔ تاہم اب سپریم کورٹ کے آئینی بینچ کی جانب سے سپریم کورٹ کے مئی کے فیصلے کی معطلی اور پشاور ہائیکورٹ کا فیصلہ برقرار رکھنے کے بعد ان ارکان کو بحال کیا گیا ہے ۔ قومی اسمبلی کے بحال ہونے والے 22 میں سے 19 ارکان کی بحالی کا نوٹیفکیشن جاری کیا جاچکا ہے جبکہ 3 نشستوں کا نوٹیفکیشن ابھی باقی ہے ۔ پارلیمانی ذرائع کے مطابق قومی اسمبلی کے بحال ہونے والے 19 اراکین کو 13 مئی سے لے کر آئینی بینچ کے فیصلے کی تاریخ تک بنیادی تنخواہیں ادا کی جائیں گی تاہم ٹی اے ڈی اے اور دیگر الاؤنسز نہیں ملیں گے ۔ 13 مئی 2024 سے 31 دسمبر 2024 تک ہر رکن کو ڈیڑھ لاکھ روپے بنیادی تنخواہ ادا کی جائے گی۔ یکم جنوری 2025 سے عدالتی فیصلے تک بڑھی ہوئی تنخواہ کے تناسب سے بنیادی تنخواہ ملے گی۔ اسی طرح صوبائی اسمبلی کے 55 مخصوص نشستوں کے اراکین کو بھی بنیادی تنخواہ ان کی اسمبلیوں کے ایکٹ کے مطابق ادا ہوگی۔
