پاکستا نی پاسپورٹ رینکنگ میں بڑی چھلانگ مارے گا : وزیر داخلہ
کراچی( مانیٹرنگ ڈیسک)وفاقی وزیرِ داخلہ محسن نقوی نے کہا ہے کہ متحدہ عرب امارات میں پاکستانیوں کو ویزے نہیں مل رہے ، کویت اور اومان میں بھی ویزوں کے مسائل ہیں، جلد ہی ان کا حل نکالیں گے۔
کراچی چیمبر آف کامرس میں خطاب کرتے ہوئے انہوں نے کہا کہ محرم کے ابتدائی 10 روز پاکستان بھر میں بخیر و عافیت گزرگئے ، تمام صوبوں کا اس میں اہم کردار ہے ۔ان کا کہنا تھا کہ رواں سال محرم میں ہم نے صوبوں کے ساتھ رابطہ رکھا اور کم سے کم جگہوں پر موبائل سروس بند رکھی، شہریوں کو موبائل سروس کی محدود بندش کی وجہ سے کافی ریلیف ملا۔وزیر داخلہ نے کہا کہ پاسپورٹ کی رینکنگ پر بھی کام جاری ہے ، جلد ہی پاکستانی پاسپورٹ رینکنگ میں بڑی چھلانگ مارے گا ، جس پر ہمیں فخر ہوگا۔انہوں نے کہا کہ کراچی صحت مند ہوگا تو پاکستان صحت مند ہوگا، آنے والے وقت میں کمی اور کوتاہیاں مزید ختم کی جائیں گی۔ان کا کہنا تھا کہ 2 سال میں ہم نے سمگلنگ کو بہت حد تک کنٹرول کیا ہے 1 ہزار 2کلومیٹر کی کوسٹ لائن ہے اور ہمارے پاس محض 6 کوسٹ گارڈ بوٹس ہیں، اب مزید اس میں 2 بوٹس کا اضافہ کیا ہے ، کوسٹ گارڈز کو مزید مضبوط کریں گے ۔شناختی کارڈ میں شہریوں کے کریمنل ریکارڈ کے حوالے سے نادرا سے گفتگو ہو رہی ہے ، سیف سٹی پروجیکٹ کی وجہ سے جرائم میں خاطر خواہ کمی واقع ہوئی ہے ، کراچی کا سیف سٹی پروجیکٹ بھی جرائم میں کمی کا سبب بنے گا۔محسن نقوی نے کہا کہ آنے والے دنوں میں دیکھیں گے کہ ڈالر کی بلیک مارکیٹ میں خرید و فروخت کو ختم کردیں۔
