صنعتی تنازعات : 7شہروں میں قائم کورٹس ویڈیو لنک سے منسلک
اسلام آباد (اپنے نامہ نگار سے ) قومی کمیشن برائے صنعتی تعلقات(این آئی آر سی) نے صنعتی تنازعات کے حل کیلئے ملک کے 7 شہروں میں قائم کورٹس کو ویڈیو لنک سے منسلک کر دیا۔
چیئرمین این آئی آر سی جسٹس(ریٹائرڈ)شوکت عزیز صدیقی کی ہدایت پر تمام عدالتوں میں ویڈیو لنک کی سہولت فراہم کر دی گئی، جس سے ججز کے ٹی اے ڈی اے کی مد میں لاکھوں روپے بچا لئے گئے ، یہ رقم سٹاف کے جوڈیشل الاؤنس میں شامل کی جائے گی۔ مقدمات کی پیروی کیلئے ججز کے دیگر شہروں کے سفر، رہائش اور کھانے پینے پر لاکھوں روپے اخراجات آ رہے تھے جبکہ سائلین کو بھی کیسز کیلئے دیگر شہروں کے سفر اور رہائش کے اضافی اخراجات برداشت کرنا پڑتے تھے ۔ این آئی آر سی کے مقدمات میں وکلا کو کیسز کی پیروی کیلئے متعلقہ شہر جانا پڑتا تھا، اب وکلا این آئی آر سی کے کسی بھی آفس سے دیگر شہروں کی عدالتوں میں مقدمات کی پیروی کر سکتے ہیں۔ اب وکلا این آئی آر سی کے مقدمات میں اپنے شہر سے وڈیو لنک کے ذریعے دلائل دے سکیں گے ۔
