بھارتی آبی جارحیت، حکمت عملی کیلئے خصوصی کمیٹی بنانیکا فیصلہ
لاہور(آئی این پی) بھارتی آبی جارحیت کے خلاف ایک مضبوط حکمت عملی کیلئے خصوصی کمیٹی تشکیل دینے کا فیصلہ کرلیا گیا۔
وفاقی وزیر برائے ترقی و منصوبہ بندی احسن اقبال نے کہا ہے کہ پلاننگ کمیشن کی سربراہی میں انجینئرز پر مشتمل خصوصی کمیٹی تشکیل دی جائے گی۔ انجینئرز کے وفد سے ملاقات میں احسن اقبال نے انجینئرز کیلئے لاہور میں قائم انجینئرز لا ئونج کا افتتاح کیا۔ احسن اقبال نے کہا کہ کمیٹی میں انسٹیٹیوٹ آف انجینئرز پاکستان (آئی ای پی)، پاکستان انجینئرنگ کانگرس، پاکستان انجینئرنگ کونسل (پی ای سی)اور دی انسٹیٹیوٹ آف الیکٹریکل اینڈ الیکٹرانکس انجینئرز آف پاکستان (آئی ای ای ای پی )اور دیگر نمائندے شامل ہوں گے ۔وفاقی وزیر نے کہا کہ فیڈریشن آف انجینئر نگ انسٹیٹیوشن آف پاکستان بھی تشکیل دی جائے گی، جب کہ تمام صوبوں کی مشاورت سے بھارتی آبی جارحیت سے نمٹنے کیلئے قومی پالیسی مرتب کریں گے اور صوبوں کے درمیان ہونے والے تکنیکی مسائل کو سیاسی بنیادوں پر نہیں تکنیکی بنیادوں پر حل کیا جائے گا۔
