الیکشن کمیشن نے عمر ایوب کی اثاثہ جات کیس واپس لینے کی استدعا مسترد کر دی
اسلام آباد (دنیا نیوز)الیکشن کمیشن نے اپوزیشن لیڈر قومی اسمبلی و پی ٹی آئی رہنما عمر ایوب کے اثاثوں سے متعلق کیس واپسلینے کی استدعا مسترد کر دی۔ چیف الیکشن کمشنر کی سربراہی میں پانچ رکنی بینچ نے کیس کی سماعت کی۔
دوران سماعت عمر ایوب کے وکیل نے مؤقف اختیار کیا کہ گوشواروں کی تفصیلات جمع کرانے کی آخری تاریخ 31 دسمبر ہے ، اور قواعد کے مطابق اگر کوئی غلط گوشوارے جمع ہوں تو الیکشن کمیشن 120 دن کے اندر نوٹس جاری کر سکتا ہے ، لیکن موجودہ کیس میں کمیشن نے 29 اپریل کے بعد نوٹس بھیجا، جو خلاف قواعد ہے ۔ اس بنیاد پر وکیل نے نوٹس واپس لینے کی درخواست کی۔تاہم الیکشن کمیشن نے استدعا مسترد کر دی۔ رکن الیکشن کمیشن شاہ محمد نے وکیل کو بتایا کہ پہلا نوٹس مقررہ مدت کے اندر بھجوایا گیا تھا اور عمر ایوب کو فیئر ٹرائل کا موقع فراہم کیا گیا ہے ۔الیکشن کمیشن نے عمر ایوب کی درخواست مسترد کرتے ہوئے کیس کی مزید سماعت 29 جولائی تک ملتوی کر دی۔
