سرمایہ کاروں کا ہر جائز مطالبہ پورا کیا جائے گا :احسن اقبال
اسلام آباد( مانیٹرنگ ڈیسک ،این این آئی)وفاقی وزیر منصوبہ بندی و ترقی احسن اقبال نے بزنس کمیونٹی کو یقین دہانی کروائی ہے کہ آئندہ ہر منصوبے کی بروقت تکمیل کیلئے حکومت متبادل تنازعہ حل کرنے کا طریقہ کار فراہم کرے گی۔
ایسوسی ایشن آف کنسلٹنگ انجینئرز پاکستان کی جانب سے تین روزہ بین الاقوامی کانفرنس سے خطاب کرتے ہوئے انہوں نے کہاکہ سرمایہ کاروں کے ہر جائز مطالبے کو بلا چوں چرا پورا کیا جائیگا۔انہوں نے کہاکہ موجودہ ترقیاتی سمت پائیدار ترقی، ماحول دوست اقدامات اور کم لاگت حل پر منحصر ہے ۔انہوں نے کہا کہ اڑان پاکستان پروگرام میں عوامی و نجی شراکت داری کو فروغ دیا گیا ہے ، لیکن حکومت کے مساوی مواقع اور شفافیت کے بغیر یہ حقیقی کامیابی حاصل نہیں کر سکتا ،وفاقی وزیرنے شرکا کو یقین دلایا کہ حکومت جلد ہی ترقیاتی منصوبوں میں تنازعات کے حل اور عدالتی مقدمات کی فوری تکمیل کیلئے ضروری قانونی ڈھانچہ متعارف کروائے گی۔انہوں نے ایف آئی ڈی آئی سی کے کردار کو سراہا اور ایس اے سی ای پی کو پاکستان میں عالمی سطح کی انجینئرنگ کمپنیوں کو مدعو کرنے پر خراج تحسین پیش کیا ۔
