پنجاب میں بارش متاثرین کو اکیلا نہیں چھوڑیں گے : بلاول
اسلام آباد(سٹاف رپورٹر)پی پی پی چیئرمین بلاول بھٹو زرداری نے پنجاب میں بارش کے دوران جانی و مالی نقصان پر اظہار افسوس کرتے ہوئے کہا ہے کہ پیپلزپارٹی پنجاب بھر کے بارش متاثرین کو اکیلا نہیں چھوڑے گی اورمتاثرین کو ان کا حق دلوائیں گے۔
مرید وال میں گھر کی چھت گرنے سے ایک ہی خاندان کے 5 افراد کے جاں بحق ہونے کی خبر سن کر دلی دکھ ہوا۔ حادثات میں اپنے پیاروں کو کھونے والے خاندانوں کے غم میں برابر کا شریک ہوں۔ بارش کے دوران حادثات میں زخمی ہونے والے شہریوں کے بہتر علاج معالجہ کو یقینی بنایا جائے۔ ایک بیان میں انہوں نے کہاکہ لاہور اور راو لپنڈی سمیت ڈسکہ، حافظ آباد، وزیرآباد اور گوجرانوالہ کے نشیبی علاقوں سے بارش کا پانی نکالنے کے لیے فوری اقدامات کی ضرورت ہے۔فیصل آباد، ننکانہ صاحب، منچن آباد، بہاولنگر، پاکپتن، عارف والا، قصور اور فاروق آباد کے بھی بہت سارے علاقوں میں بارش کا پانی کھڑا ہے ۔بارش میں جن شہریوں کے گھروں کو نقصان پہنچا ہے، اُنہیں فوری حکومتی امداد کی ضرورت ہے۔ بارش کی وجہ سے زرعی شعبے کو ہونے والے نقصان کا تدارک کیا جائے۔
