پنجاب اسمبلی :حکومت کا21جولائی کو سینیٹ الیکشن کا اعلان:اپوزیشن کا سڑک پر اجلاس
لاہور(سیاسی نمائندہ) پنجاب اسمبلی کے اجلاس میں 22 جولائی کو سینیٹ الیکشن کرانے کا اعلان کر دیا گیا۔ قائمقام سپیکر نے سینیٹ الیکشن کے انعقادکااعلان کیا۔پیر کو صبح 9بجے سے شام 4بجے تک سینیٹ الیکشن ہوگا، جنرل سیٹ پر ووٹنگ ہوگی،ممبران اسمبلی کیلئے سینیٹ الیکشن کیلئے خصوصی کارڈ جاری کئے گئے ہیں ۔
پنجاب کے وزیر برائے پارلیمانی امور میاں مجتبیٰ شجاع الرحمن نے اعلان کیا ہے کہ شدید بارشوں کے نتیجہ میں متاثرین کا مالی امداد کے ذریعے ازالہ کیا جائے گا۔ اس دوران جاں بحق ہونے والوں کے لئے جلد وزیر اعلیٰ مریم نواز مالی امداد کا بھی اعلان کریں گی۔ پنجاب اسمبلی کا اجلاس 2 گھنٹے 5 منٹ کی تاخیر سے قائم مقام سپیکر ملک ظہیر اقبال چنڑ کی صدارت میں شروع ہوا۔قائمقام سپیکر ظہیر اقبال چنڑ نے چھ پینل آف چیئرمینوں کے ناموں کااعلان کردیا، جن میں چودھری افتخار حسین ، غلام رضا، سردار اویس دریشک، ذوالفقار علی شاہ، ارشد ملک اور حسن ذکا شامل ہیں۔ اجلاس میں سیلاب بارش اور طوفان سے جاں بحق افراد کے لیے فاتحہ خوانی کرائی گئی، اس موقع پر حکومتی رکن مہوش سلطانہ نے سیلاب سے متاثرہ علاقوں کو آفت زدہ قرار دینے کا مطالبہ کیا۔مجتبیٰ شجاع الرحمان نے ایوان میں بڑا اعلان کرتے ہوئے کہا کہ جن ممبران کے اضلاع میں تباہی ہوئی ہے وہ نشاندہی کریں وہاں حکومت زمینداروں کے نقصان کا ازالہ کرے گی۔
مون سون میں توقع سے زیادہ بارشیں ہوئی ہیں، بارشوں کے نتیجے میں ہونے والے نقصانات کے ازالے کے لیے حکومت نے مالی امداد کا فیصلہ کیا ہے ، پارلیمانی سیکرٹری ملک وحید نے دیگر محکموں کی طرح محکمہ اوقاف و مذہبی امور میں کرپشن کا اعتراف کرلیا،ان کا کہنا تھا کہ کس محکمہ میں کرپشن نہیں ہے ؟ لیکن ہم نظام کو بہتر انداز میں چلانے کی کوشش کررہے ہیں،محکمہ اوقاف و مذہبی امور میں تبدیلی کی ضرورت ہے اسی لئے تو پیرا یا سی سی ڈی جیسے محکمہ بنائے ہیں،اگر محکمہ میں کہیں کرپشن ہوئی ہے تو اس کی نشاندہی کریں آڈٹ کروا کر ایوان میں پیش کروں گا،سرکاری کارروائی کا آغاز کرتے ہوئے پنجاب اسمبلی میں مسودہ قانون ترمیم زرعی انکم ٹیکس پنجاب 2025ئمسودہ قانون ہارٹیکلچر اتھارٹی پنجاب 2025، مسودہ قانون سینئر سٹیزنز و یلفیئر پنجاب 2025ء پیش کردئیے گئے ،سپیکر نے تینوں بلز کو متعلقہ کمیٹیوں کے سپرد کرتے ہوئے دو ماہ میں رپورٹ طلب کر لی۔اجلاس منگل 22جولائی دوپہر دو بجے تک ملتوی کردیا۔
لاہور(سیاسی نمائندہ) گزشتہ روز پنجاب اسمبلی کے باہر اپوزیشن نے عوامی اسمبلی لگائی، سپیکر کے فرائض اعجاز شفیع نے سرانجام دئیے ، اپوزیشن کے اجلاس میں ارکان نے حکومت کو فارم 47 کی ناکام حکومت قرار دیا، انہوں نے اجلاس میں سیلاب سے تباہ کاریوں اور چینی سکینڈل سمیت عوامی مسائل کی ناکامی پر قرارداد بھی منظورکرلی، اپوزیشن لیڈر نے کہا کہ حکومت کی توجہ سیلاب کی تباہ کاریوں پر نہیں بلکہ قیدی نمبر 804 پرہے ،پنجاب اسمبلی میں اپوزیشن کے معطل اراکین سے اظہار یکجہتی کے لیے حزب اختلاف نے پنجاب اسمبلی کے باہر سڑک پر عوامی اسمبلی لگا لی، سپیکر کے فرائض سرانجام دینے والے اعجاز شفیع نے اراکین کو نقطہ اعتراض پر بات کرنے کی اجازت دی تو اپوزیشن رکن امتیاز شیخ نے کہا موجودہ حکومت ترقی کے منصوبوں پر جو تصاویر لگا رہی ہے وہ سیلاب کے پانی میں بہہ گئی ہے ، کرنل ریٹائرڈ شعیب اعوان اورطیا ب راشد نے کہاکہ وزیر اعلیٰ سیاسی شعبدہ بازی کررہی ہے اور اپوزیشن کو دبا رہی ہے ،پنجاب ڈوب رہا ہے ، فصلیں ڈوب گئیں گھر برباد ہو گئے لیکن حکومت کو کوئی ہوش نہیں،طیاب راشد ، شعیب اعوان و دیگر اپوزیشن لیڈر ملک احمد خان بھچر کاکہنا تھاکہ جب تک معطل اراکین اندر نہیں جائیں گے تو ہم بھی اندر نہیں جائیں گے اور پنجاب کی صورتحال کافی گھمبیر ہو چکی ہے ،پنجاب میں چار دن سے حکومتی منصوبوں کا پول کھل گیا ۔سیلاب کی تباہ کاریوں، چینی اور پٹرول کی بڑھتی قیمتوں کے خلاف اپوزیشن لیڈر احمد بھچر نے قرار داد پیش کی جسے منظور کر لیا گیا، ایجنڈا مکمل ہونے پر عوامی اسمبلی کے سپیکر اعجاز شفیع نے اجلاس غیر معینہ مدت کے لئے ملتوی کردیا۔
