میڈیا کی ادائیگیاں ورکرز کی تنخواہوں سے مشروط کرنیکا فیصلہ
لاہور(سٹاف رپورٹر)وزیراطلاعات عظمیٰ بخاری کی ہدایت پر صحافیوں کے مسائل کے حل کے لئے بنائی گئی کمیٹی کا دوسرا اہم اجلاس گزشتہ روز سیکرٹری اطلاعات طاہر رضا ہمدانی کی صدارت میں ہوا۔
جس میں ڈی جی پی آر غلام صغیر شاہد اور صحافتی تنظیموں کے نمائندوں نے شرکت کی۔اجلاس میں صحافیوں کے مسائل کے حل کے لئے اہم اور تاریخی فیصلے کئے گئے ۔ صحافیوں کو تنخواہوں کی باقاعدگی سے ادائیگی یقینی بنانے کے لئے حکومت کی طرف سے الیکٹرانک اور پرنٹ میڈیا کی ادائیگیاں ورکرز کی تنخواہوں سے مشروط کرنے کا فیصلہ کیا گیا۔ ملازمین کو بروقت ادائیگی نہ کرنے پر ڈی جی پی آر کو ادائیگیاں نہ کرنے کا اختیار دے دیا گیا۔تمام ادارے ڈی جی پی آر کو اپنے ورکرز کو دی گئی تنخواہوں کا سرٹیفکیٹ ماہانہ بنیادوں پر دینے کے پابند ہوں گے ۔اجلاس میں صحافیوں کو جاری کئے جانے والے ایکریڈیٹیشن کارڈز کے لئے صحافتی تجربہ کی مدت 10 سال سے کم کر کے 5 سال کر دی گئی۔تمام صحافتی تنظیموں نے ڈمی اخبارات کے خاتمے کے لئے ڈی جی پی آر کی مکمل حمایت کرنے کا اعلان کیا۔ اجلاس میں صدر اے پی این ایس سرمد علی، صدر سی پی این ای کاظم خان، سیکرٹری ایمنڈ حافظ طارق محمود،سینئر وائس پریذیڈنٹ سی پی این اے ایاز خان اور ممبران اے پی این ایس نور اللہ اور محسن ممتاز نے شرکت کی۔
