قاسم و سلیمان پاکستان آکر کیا تیر مار لیں گے ؟عظمیٰ بخاری
لاہور (اے پی پی)وزیر اطلا عات پنجاب عظمیٰ بخاری نے کہا ہے کہ اگر بانی پی ٹی آئی کے صاحبزادے انتشار پھیلانے کیلئے پاکستان آنا چاہتے ہیں تو ان کو اس کی ہر گز اجازت نہیں ملے گی،اگر وہ اپنے والد سے ملنا چاہتے ہیں تو شوق سے پاکستان آئیں ان کو کوئی نہیں روکے گا ۔
ہفتہ کے روز جاری ایک بیان میں عظمیٰ بخاری نے کہاکہ علیمہ خانم کو بھی اپنے بھائی کی طرح مسلسل جھوٹ بولنے کی عادت ہو چکی ہے ، ان کے بیانات میں تضاد اور غیرسنجیدگی عیاں ہے ،کبھی علیمہ خان کہتی ہیں قاسم اور سلیمان پاکستان آ رہے ہیں، کبھی کہتی ہیں نہیں آ رہے ۔ کبھی دعویٰ کرتی ہیں ان کی والدہ نے اجازت نہیں دی، تو کبھی ویزے کا بہانہ بنایا جاتا ہے ۔ وزیر اطلاعات پنجاب نے مزید کہا کہ علیمہ خان کبھی نائیکوپ کے تحت انہیں پاکستانی قرار دیتی ہیں اور پھر ویزا مانگنے کی بات کرتی ہیں ، وہ جن کے بچے ہیں پہلے ان سے تو پوچھ لیں وہ آنے کی اجازت دے رہے یا نہیں؟۔عظمی بخاری نے کہا کہ جب بچوں کے والد،والدہ سوئم اور فسادیوں کا گرو ہ انقلاب نہیں لاسکے تو قاسم و سلیمان کیا تیرمارلیں گے ؟۔انہوں نے کہاکہ بانی پی ٹی آئی کے بچے امریکا سیر سپاٹے کرنے گئے تھے وہ گھوم پھر کے واپس لندن پہنچ گئے ۔ عظمیٰ بخاری نے کہا کہ ہاں البتہ اگر بانی پی ٹی آئی کے صاحبزادے انتشار پھیلانے کیلئے پاکستان آنا چاہتے ہیں تو اسکی انکو ہر گز اجازت نہیں ملے گی کیونکہ وہ غیرملکی شہری ہیں، اگر غیر ملکی بچوں نے ہی تحریک چلانی ہے تو یہاں موجود پی ٹی آئی قیادت کو شرم ضرور آنی چاہیے ۔
