اپوزیشن اتحاد کے اعلامیہ پر بی ایل اے کی چھاپ شرمناک:عرفان صدیقی
اسلام آباد(مانیٹرنگ ڈیسک )مسلم لیگ (ن) کے سینیٹر عرفان صدیقی نے اپوزیشن اتحاد سے سوال کیا ہے کہ کیا اپوزیشن اتحاد پاکستان اور 25 کروڑ عوام کی فتح کو بھی اپنی فتح نہیں سمجھتا جسے ساری دنیا نے تسلیم کیا ہے ۔
سوشل میڈیا 'ایکس' پر اپنے بیان میں انہوں نے کہا کہ تحریک تحفظ آئین پاکستان اے پی سی کے پانچ صفحات اور 32 نکات پرمشتمل طویل اعلامیے میں ہر چھوٹے بڑے ، حقیقی اور خیالی مسئلے کا ذکر ہے لیکن پاک بھارت جنگ کے بعد ہونے والے اپوزیشن کے اس پہلے با ضابطہ اجتماع میں بھارت کے خلاف پاکستان کی عظیم فتح اور معرکہ حق کے بارے میں ایک لفظ تک نہیں کہا گیا۔ انہوں نے کہا کہ بلوچستان کے بارے میں اے پی سی کے اعلامیے پر بی ایل اے کی چھاپ شرمناک حد تک واضح ہے ۔ پاکستان کی مسلح افواج، شہیدوں اور غازیوں سے پی ٹی آئی اور اس کے اتحادیوں کا بغض اپنی جگہ، لیکن کیا اپوزیشن اتحاد پاکستان اور 25 کروڑ عوام کی فتح کو بھی اپنی فتح نہیں سمجھتا جسے ساری دنیا نے تسلیم کیا ہے ؟ انہوں نے کہا کہ بلوچ طلبا کے حقوق کا تذکرہ اچھی بات ہے لیکن کیا برسوں سے بھارتی حمایت یافتہ دہشت گردوں کے ہاتھوں چن چنُ کر قتل کئے جانے والے پنجابیوں کے خون سے آپ کا کوئی رشتہ نہیں؟ ۔
