حکومت کا اگلے 6 ماہ تک گیس قیمتیں نہ بڑھانے کا اعلان
قیمتیں برقرار رکھیں گے ، گیس سیکٹر میں سرکلرڈیٹ کا اضافہ رک گیا :علی پرویز عوام کو موسم سرما میں زیادہ سے زیادہ ریلیف دے رہے :وفاقی وزیر پٹرولیم
اسلام آباد (آئی این پی )حکومت نے گیس کی قیمتوں میں اگلے 6 ماہ تک کوئی اضافہ نہ کرنے کا اعلان کر دیا۔وفاقی وزیر پٹرولیم علی پرویز ملک نے میڈیا سے گفتگو کرتے ہوئے کہا کہ گیس کی قیمتیں نہیں بڑھا رہے ، وزیر اعظم کی ہدایت کے مطابق گیس کی قیمتیں برقرار رکھیں گے ،گیس کی قیمتوں میں اگلے 6 ماہ تک کوئی اضافہ نہیں ہوگا، اصلاحات کے باعث تمام صارفین کیلئے گیس کی قیمتیں برقرار رہیں گی۔انہوں نے کہا کہ گیس سیکٹر میں سرکلرڈیٹ کا اضافہ رک گیا ، نیا قرض پیدا نہیں ہورہا، قطر سے اضافی ایل این جی کارگو عالمی منڈی میں منتقل کرنے کا کامیاب معاہدہ ہوگیا ہے ۔ علی پرویز ملک نے مزید کہا کہ وزیراعظم کی ہدایت پر عوام کو موسم سرما میں زیادہ سے زیادہ ریلیف دے رہے ہیں، ملک بھر میں گھریلو صارفین کو گیس کی بہتر فراہمی جاری ہے ،کوئی بھی مقامی گیس فیلڈ بند نہیں ۔
