لارڈز ٹیسٹ میں شاندار کارکردگی نے معین کی قسمت چمکا دی
بیٹنگ میں 21ویں ،باؤلنگ میں 19ویں اور آل راؤنڈرز میں چوتھی پوزیشن پالی جوروٹ نے کیوی کپتان ولیم سن سے دوسری پوزیشن چھین لی ،ٹیسٹ رینکنگ جاری
لندن(سپورٹس ڈیسک)لارڈزٹیسٹ میں جنوبی افریقہ کیخلاف شاندار کارکردگی نے برطانوی آل راؤنڈر معین علی کی قسمت چمکا دی۔انٹر نیشنل کرکٹ کونسل کی نئی ٹیسٹ رینکنگ میں معین علی نے بیٹنگ ، باؤلنگ اور آل راؤنڈر کیٹیگری میں کیریئر کی بہترین پوزیشنز حاصل کرلیں ۔ جنوبی افریقہ کیخلاف لارڈز ٹیسٹ میں 87رنز بنا کر معین علی بیٹنگ میں 21ویں پوزیشن پر براجمان ہوئے جبکہ میچ میں 10وکٹیں لینے کے بعد 9سیڑھیاں پھلانگ کر 19ویں نمبر پر پہنچ گئے ، آل راؤنڈرز کی فہرست میں وہ پہلی مرتبہ اپنے ساتھ کھلاڑی بین سٹوکس کو پیچھے چھوڑتے ہوئے چوتھے نمبر پر آگئے ہیں ۔برطانوی کپتان جو روٹ 190رنز کی اننگز کھیلنے کے بعد کیوی کپتان کین ولیم سن کو پیچھے چھوڑتے ہوئے دوسری پوزیشن پر پہنچ گئے ہیں ،وکٹ کیپر بلے باز جونی بیئر سٹوایک پوزیشن بہتری کے ساتھ 10ویں نمبر کے بلے باز بن گئے ہیں جبکہ سابق کپتان الیسٹر کک 2درجے بہتری کے ساتھ 11ویں اور گیری بیلنس 3پوزیشنز بہتر بنا کر 59ویں نمبر پر پہنچ گئے ہیں ، بیٹنگ میں جنوبی افریقہ کے ٹمبر باووما4سیڑھیاں چڑھ کر 41ویں اور فلینڈر 8درجے بہتری کے ساتھ 66ویں نمبر پر موجودہیں۔باؤلنگ میں جنوبی افریقی فاسٹ با ؤلر مورنے مورکل اور فلینڈر نے بالترتیب 10ویں اور 13ویں پوزیشن سنبھال لی ہے ۔ یاد رہے کہ لارڈز ٹیسٹ میں انگلینڈ نے جنوبی افریقہ کو 211رنز سے شکست دی جہاں سپنر معین علی نے پہلی اننگز میں چار اور دوسر ی اننگز میں 6وکٹیں حاصل کیں ۔ دونوں ٹیموں کے مابین دوسرا ٹیسٹ 14جولائی سے ٹرینٹ برج میں شروع ہوگا ۔
