ناقص فیلڈنگ کے باعث پاکستان ٹی 20 سیریز گنوا بیٹھا
سڈنی(سپورٹس ڈیسک )ناقص فیلڈنگ کے باعث پاکستان ٹی 20سیریز گنوابیٹھااور آسٹریلیا نے 0-2 کی فیصلہ کن برتری حاصل کرلی ،سڈنی میں کھیلے گئے میچ میں آسٹریلیا کی جانب سے دیئے گئے ۔۔
148 رنز کے ہدف کے تعاقب میں پاکستان ٹیم 19.4 اوورز میں 134 رنز بنا کر آؤٹ ہوگئی۔اس سے قبل آسٹریلوی کپتان جوش انگلس نے ٹاس جیت کر پہلے بیٹنگ کا فیصلہ کیا، آسٹریلیا کی جانب سے اننگز کا آغاز میتھیو شارٹ اور جیک فریسر مک گرک نے کیا۔پاکستان کو اننگز کے پہلے دو اوورز مہنگے پڑے لیکن حارث رؤف نے 52 کے مجموعے پر پہلے جیک فریسر اور پھر کینگروز کپتان جوس انگلس کو پویلین بھیج دیا، عباس آفریدی نے میتھیو شارٹ کو 32 کے انفرادی سکور پر آؤٹ کیا۔ ایرون ہارڈی 28 رنز بنا کر عباس آفریدی کا شکار بنے ۔مقررہ 20 اووز میں آسٹریلیا کی ٹیم نے 9 وکٹوں کے نقصان پر 147رنز بنائے ۔پاکستان کی جانب سے حارث رؤف نے 4 اور عباس آفریدی نے 3 کھلاڑیوں کو آؤٹ کیا جبکہ دو وکٹیں صفیان مقیم کے حصے میں آئیں۔148 رنز کے تعاقب میں پاکستان ٹیم 19.4اوورز میں 134 رنز بنا کر آؤٹ ہوگئی۔پاکستان کے عثمان خان نے 52 رنز کی اننگز کھیلی جبکہ عرفان خان 37 رنز بنا کر ناقابل شکست رہے ۔کپتان محمد رضوان نے 16 رنز بنائے ۔صاحبزادہ فرحان نے 5 اور عباس آفریدی نے 4 رنزبنائے ۔ بابراعظم نے 3 اور حارث رؤف نے 2 رنز بنائے ۔پاکستان کے چار کھلاڑی سلمان آغا، شاہین آفریدی، نسیم شاہ اور سفیان مقیم بغیر رن بنائے آؤٹ ہوئے ۔گرین شرٹس کو آخری اوور میں جیت کے لیے 16 رنز درکار تھے ، جو نہ بن سکے ۔آسٹریلیا کے اسپینسرجانسن نے 26 رنز دے کر 5 وکٹیں حاصل کیں اورپرپلیئر آف دی میچ قرار پائے ، ایڈم زمپا نے 2 اور زاویئر بارٹلیٹ نے ایک وکٹ لی۔دوسرے ٹی ٹو نٹی کیلئے آسٹریلیا کی ٹیم میں کوئی تبدیلی نہیں کی گئی جبکہ پاکستانی ٹیم میں حسیب اللہ کی جگہ سفیان مقیم کو شامل کیا گیا تھا۔ پاکستان اور آسٹریلیا کے درمیان تیسرا ٹی ٹو نٹی کل کھیلا جائے گا۔
