میرا کام کھیلنا ہے سیاست نہیں:شاہین آفریدی،مزارقائدپرحاضری
کراچی (سپورٹس ڈیسک )قومی ٹیم کے فاسٹ بولر شاہین شاہ آفریدی بانی پاکستان قائداعظم محمد علی جناح کے یوم پیدائش پر مزار قائد پہنچ گئے ۔
قومی کرکٹر نے بابائے قوم قائداعظم محمد علی جناح کے مزار پر حاضری دی، فاتحہ خوانی کی اور پھول رکھے ۔اس موقع پر میڈیا سے گفتگو کرتے ہوئے انہوں نے کہاکہ بڑے اعزاز کی بات ہے کہ مزارِ قائد پر حاضری کا موقع ملا، میرا کام کھیلنا ہے سیاست نہیں۔تاریخی ون ڈے سیریز جیتے ہیں، کھلاڑیوں نے کوشش کی تو کامیابی ملی۔ پاکستان کرکٹ کیلئے یہ سال اچھا رہا، جس طرح جنوبی افریقہ کو شکست دی وہ تاریخی کامیابی ہے ، گرین جرسی پہننا میرے لیے اعزاز ہے ۔ ٹیم نے کبھی ہمت نہیں ہاری، جب ملک کی نمائندگی کرتے ہیں تو فخر ہوتا ہے ، چیمپئنز ٹرافی کے لیے تیاریاں اچھی ہیں۔ میں نے ہمیشہ پاکستان کیلئے کھیلا ہے ، سب مل کر صرف پاکستان کیلئے کھیلتے ہیں، بھارت اگر پاکستان میں کھیلتا تو اچھی مہمان نوازی کرتے ، اب وہ جہاں بھی کھیلے مقابلہ کرنے کیلئے تیار ہیں۔
